繼「亞洲股神」李兆基表示龍頭股已經升到咁上下，要吼龍尾股之後，報界投資老行尊都話要尋找有價值嘅二線股。綜合其理論，揀股嘅條件包括係市價低於資產賬面值、行業止跌回升、相對估值偏低，以及下跌空間唔大嘅落後股。
事實上，近來細價股當炒之餘，升勢已蔓延至長期唔郁嘅「化石股」。此類股份包括近期開始爆升嘅毅力工業（332），其股價於04年中由3個幾一路跌，跌足8成至6毫幾子左右橫行逾兩年，一旦重展升浪，有排追。
毅力近幾年受困於原材料漲價，純利出現倒退，但營業額其實相當穩定，每年做二十幾三十億生意，為爭取較高毛利已轉做更多數碼產品及汽車音響，唔排除近日股價回升係反映嚟緊一兩年業績顯著復蘇，候低要買。
另外，業務相若而專注做聲學產品嘅成謙聲匯（2728）唔使等業績復蘇，現價已經好有吸引力。該公司今年主攻增長迅速的i-Pod及LCD電視的音響解決方案市場，以去年全年純利5032萬元計，現價往績PE僅5倍，有6厘3息，據聞DavidWebb都有出席其上星期之股東會畀意見，一旦再增持並申報持逾5%，成謙聲匯隨時有機會變「聖誕禮物」。
中信21靜極思動
中信系內股份今年表現唔錯，除中信泰富（267）屢創新高之外，中信資源（1205）亦已變成中國第4大石油公司，系內得隻中信21世紀（241）唔識郁，上周五終輪到佢炒上，升28%，單日成交過百球，兩年來最大。此股主要做電子報關及質檢服務，上周五咁大成交炒上，唔似亁炒牛河，以公司背景有注資都唔出奇。