支聯會今日舉行愛國民主大遊行，相信唔使八方多講，大家維園見！事隔十幾年，大家諗起六四嗰一晚，仍然咁傷感，民建聯馬力仲喺全港市民傷口上灑鹽，真係挑戰港人良知底線。口出狂言後，馬力返廣州養病避鋒頭，相信六四周年前都唔會蒲頭，其他左派趁佢病，好似想攞佢命，成個北京代言人咁款嘅人大常委曾憲梓，噚日可能嫌馬力講錯嘢唔夠甘，執死雞攞彩再送佢一程。
曾憲梓：不幸嘅歷史
曾憲梓成日亂噏嘢俾人鬧，今次終於有人墊底。佢話馬力同記者茶敍時講六四嘅嘢「失言」，仲句句有骨暗批馬力唔跟中央路線，事關中央一直淡化六四，識做嘅就唔好亂講，千祈咪小事化大，𠵱家首要搞好經濟向「錢」看。馬力衰多口俾人抦，曾常委醒得多，輕描淡寫咁話六四係「不幸嘅歷史事件」。
支聯會向天生殺豬狂馬力下戰書，擺擂台公開辯論六四真相，馬力避走廣州冇回應，好明顯係唔想刺激市民上街，民建聯就玩隱形，黨內有頭有面人物，今日都匿埋晒，唔出席大型公開活動或者搞大function，費事露面激起民憤。但過咗今日，民建聯都仲未過到骨，事關星期三立法會就辯論六四議案，下星期一就係六四燭光集會，八方認為馬力最好企出嚟講清講楚，因為避得一時，避唔到一世，唔通佢打算長住廣州，做離岸立法會議員，遙控黨務？
不過馬力可能身不由己，連曾常委都批評佢失言，即係損害社會和諧，相信北京同煲呔都唔想馬力露面，至少7.1前都唔好返香港，否則搞到7.1回歸10周年大喜日子都人人上街，國家顏面何存？馬力想補鑊，最好自己行開吓，暢遊大江南北遊山玩水又好，遁迹山林打坐靈修都得，自我軟禁一年半載，話唔定國家乃念佢冇功都有勞，既往不咎。
可遊行到民建聯總部
往時愛國民主大遊行或六四燭光集會散場後，長毛同道長古思堯等人，會抬棺材去中聯辦或中央駐港特派員公署示威抗議，有民主派人士同八方吹水時講笑話，今年可以搞搞新意思，可以成隊人操去民建聯總部，咪等左派以為匿埋就得，屠城血債，出得嚟行，預咗要還。