新海能源（342）嚟緊07年度會有爆炸性增長，預期PE得4字頭，平得交關。新海主打華南區一條龍式液化氣業務，06年度（12月止）實際純利增長去到40%，貼近5000萬銀，往績PE仲係企喺8倍單位數。
照咁睇，新海正喺進行儲容擴建工程，單係呢壇製作，新海每噸液化氣進口成本，已經可以慳番45蚊。新海維持到往年40、50萬噸水平，所節省成本，已經變相賺多2000萬銀。估計連埋業務自然增長，新海07年度純利有機會上8000萬銀，預期PE落番4.9倍。ChinaPlay仲係講呢個單位數PE，冇道理。
再講，新海最新P/B0.89倍，市場近磅股嘅P/B，都講緊兩倍水位，秤P/B，新海亦係抵到爆。以P/B計數，新海追近啲，上到1.5倍，現價（0.82元）要升近70%到1.39元；以PE計數，新海現價翻一番到1.64元，預期PE仲係單位數。
炒折讓遲早到麗國
麗國（191）最新NAV1.94元，就當集團冇條件重秤，旗下麗豐（1125）亦冇任何增值能力，以麗國呢個NAV水位，現價（0.7元）折讓都講緊64%，吸引到痹。
又呢期市場狂炒有折讓兼有重組概念嘅股仔，包括泛海（129）系同力寶（226）系都升到飛起。麗國係麗新系旗艦，最新市值得11億銀，唔信就咁投閒置散。就當麗國炒折讓，NAV折讓係咁意收窄到50%計，麗國都要見0.97元，代表要升近40%。