劉德華日前喺台灣拍攝新歌MV返嚟香港後，竟然惹上是非，佢噚日將自己返公司為演唱會開會嘅相貼上網誌，以「我的家裏只有天使」為題，內容就話近日有傳媒不停纏繞佢同佢家人，仲打電話問佢加多利山屋企係咪鬧鬼，佢老父係咪病重，所以畀錢搵個高人嚟做法事兼幫佢爸爸施法。
華仔喺文中講到聽見有記者問佢屋企係咪有污糟嘢時，佢反問：「乜叫污糟嘢？」個心就鬧對方好離譜，佢又話噚日咁啱狂風雷暴，如果換着以前嘅佢，遇到呢啲事，心情一定都係打大風，但𠵱家佢已經唔會理，仲學曉點樣喺風雨中上路，照樣過快樂生活，照樣投入忙碌工作之中。
「家是我的天堂」
華仔強調佢爸爸身體健康，仲話：「我的家是我的天堂，那裏只有天使。」馮仁昭睇完網誌後打電話畀華仔，佢喺電話度話：「呢兩日係有記者走嚟同我講埋啲神神怪怪、導人迷信嘅嘢，我咪寫出嚟等大家笑吓囉，我已經話咗冇咁嘅事，希望佢哋諗清楚後唔會亂寫啦，不過如果為咗銷量，夾硬都要寫，我都冇辦法。我心情就冇乜嘢，不過公司就會出律師信囉。」
