葉劉當年全力捍衞自己個掃把頭髮型，可惜民意唔like佢個look，葉劉「護髮」成功，卻賠上民望。
原來「民主女神」余大狀對自己形象都好有主見。佢接受港台普通話台訪問時透露，參選時有民主派戰友提佢，從政者衣着要低調啲，着住一身名牌派單張唔係幾好。余大狀好老實咁講，其他嘢要佢改有得傾，針對佢着衫品味同打扮外形就noway，「我本來就是這樣，這才是真我，要我改，我辦不到。」
法庭dresscode要端莊得體，所以大狀着衫唔係黑就係白，余大狀話佢最怕單調，所以衣櫃最多只有兩、三套黑白色套裝「戰衣」，佢對自己配襯品味好有自信，笑言好多朋友見到佢上鏡，都讚佢戴嘅耳環靚，「只記得我的耳環，我是個不成功的從政者。」