無綫《志雲飯局》又開局，噚晚播出財爺唐英年訪問，餐飯席設文華東方，TVB出餸，唐英年就出紅酒，攞支私人珍藏出嚟歎吓，係1982年嘅ChateauMouton-Rothschild，市價約一萬蚊。財爺話當年喺美國讀書，放學後同班同學飲酒吹水，但佢唔鍾意威士忌同啤酒，飲橙汁又失威，於是開始飲紅酒，生平買嘅第一支紅酒只係一蚊美金。
老董落台政局驟變，唐唐話煲呔同老董最大唔同之處，係前者熟悉政府運作，識得幾時㩒掣，識得避開地雷，老董唔曉，最終撞板。
唐英年做工商及科技局局長時，公開話喺佢有生之年，失業率都唔會跌到97年前嘅2.2%，咁講法令市民嘩然。佢話當時啱啱加入政府，講嘢太率直，如果𠵱家先面對呢個問題，佢識轉膊嘞，只會話失業率跌到2.2%係唔正常嘅。志雲大師問唐英年想唔想做特首，佢一味謙稱自已何德何能。經一事，果然長一智。