今屆康城影展最高榮譽的金棕櫚獎，將會在香港時間明日凌晨時分頒發，今年22齣來自世界各地的作品競爭激烈，本報特別找來兩位身在康城觀摩的香港電影人，包括百老匯電影中心負責人麥聖希及資深影評人黃國兆品評各齣奪獎大熱，他們認為王家衛的《MyBlueberryNights》要勝出，有一定的難度。
採訪：何永寧
《MyBlueberryNights》
欠新鮮感難突圍
（香港、法國）
導演：王家衛
麥聖希︰保留咗王家衛嘅傳統風格，但假如我係評審，會期望部作品有新鮮感，加上今屆其他對手實力強橫，要致勝有一定難度。
《潛水鐘與蝴蝶》
感人細膩有創意
（TheDivingBellAndTheButterfly）
（法國、美國）
導演︰JulianSchnabe
麥聖希︰齣戲由真人真事改編，講述雜誌編輯因全身癱瘓，只能靠眨眼與其他人溝通嘅故事。雖然題材傷感，但影片非常精采，導演採用唔少高難度技巧及大量主觀鏡頭，例如主角喊嗰陣，銀幕上濕濛一片，細膩而有創意。呢套片相信係評審嘅心頭好，奪得大獎機會好高。
黃國兆︰呢個故事早前已拍過紀錄片，主人翁應該已經唔在世。雖然影片格局冷門，但拍得好感人，真情流露，我自己好鍾意，相信亦好啱評審口味。
《4Months,3WeeksAnd2Days》
新導演拍得寫實
（羅馬尼亞）
導演︰CristianMungiu
麥聖希︰齣戲以墮胎為題材，拍得好寫實，風格簡潔有力，不過由於導演係新人，奪獎機會相對較細。
《Alexandra》
反戰片畫面唯美
（俄羅斯）
導演︰AlexanderSokurov
麥聖希︰呢部係短小精悍嘅反戰電影，導演手法相當高明，完全冇渲染血腥場面及煽情，只講述一位祖母探望打仗受傷嘅孫兒，透過同孫兒及佢班同僚嘅對話，去反映戰爭嘅殘酷，單色畫面唯美之極。張曼玉當日出席咗呢套戲嘅紅地毯首映，相信佢幾鍾意部戲。
幽默似《雪花高》
《NoCountryForOldMen》
（美國）
導演：高安兄弟（CoenBrothers）
麥聖希︰呢個黑色幽默嘅故事，同導演嘅舊作《雪花高離奇命案》（Fargo）有啲相似，其他影評人嘅評價甚高，亦都係我心水之選。
我是誰：資深影評人戲癮勁
現身在康城的香港資深影評人麥聖希，是百老匯電影中心負責人，他最初在《信報》文化版當記者寫電影，後轉至電影中心工作，是電影中心的老臣子之一。他欣賞過無數大大小小的電影，也試過在康城影展由早上8時、一直看到午夜場時段，足見他對電影充滿熱誠。
至於資深影評人黃國兆，曾任職香港國際電影節節目策劃，負責揀選亞洲以外的影片，亦曾在藝術中心電影部和百老匯電影中心工作。
