個個港姐都話美貌與智慧並重，喺03年贏得最上鏡同才藝大獎嘅李詩韻（Selena），就被評判一致認定兩樣都有！不過上到公仔箱就掉番轉，演親都係楚楚可憐、專俾男人搵笨嘅蠢女人，現實中就連喺馬路都經常俾人無情Cut線、響按催趕，可謂處處受氣，可能同揸開架車仔HondaSHE不無關係。問佢DreamCar係乜？諗都唔諗就話要寶馬大牛龜越野四驅車X3，安全同穩陣只係其次：「架BMWX3夠高大，行出嚟夠霸道嚇人，你哋咪再恰我！」
文：許一楓
攝影：陳偉強
服裝：mi-tu
化妝：SynniTam
髮型：Jay@Hair
扮刁蠻打人勁High
老老實實，近年港姐名氣大不如前，唔好話上年，連今年三甲叫乜名相信都考起人！而03年港姐中大熱倒灶嘅Selena星運反而平步而上，可能同佢扮親都係小鳥依人、癡情又蠢蠢哋嘅角色有關喇，男人最Buy呢類小女人，個個封佢做最佳情人同老婆，連車版一眾麻甩仔都將Stephy、Fiona等夢中情人拋諸腦後！
從《老婆大人》梁昕昕、《本草藥王》吳慕榕，到剛播完嘅《天機算》，Selena始終跳唔出怕事、細膽嘅小女人角色，仲係受盡觀眾同情嗰種，之不過Selena不甘示弱：「喺05年TVB嗰套《佛山贊師父》，我就演一個刁蠻格格，專打人同鬧人，野蠻到不得了，呢類角色好有發揮，演得好High好開心！」
揸大車嚇走無禮司機
雖然吹噓自己兇狠，但一問到現實中有冇俾人恰，Selena又掩不住柔弱：「13歲時同家姐表妹去海洋公園，突然後面有班男仔過嚟追住我哋，嚇到我哋匿入廁所，佢哋可能覺得好過癮，但係我哋就驚到喊咗出嚟！」
俾人恰開有條路，連揸車都遇過無禮司機對待：「有時拍戲出Show，着條短裙戲服揸車，自不然會露出隻腿，可恨揸架HondaSHE較矮細，經常俾隔籬線啲麻甩司機喪昅，仲出口撩我㖭，好HardFeeling！」見Selena越講越氣憤，原來仲有下集：「有次揸車，隔籬架大貨Van突然Cut埋嚟，嚇到我死，擺明專恰我哋細車咁，好乞人憎！」
揸車被大車恰，Selena話揀車都要搵架高頭大馬嘅寶馬X3：「佢夠高夠闊，隔籬車一定望唔到我着短裙；加上外形硬淨，好Powerful，貨車見到都唔敢埋我身啦！」
狂兜圈掟到記者頭暈
拍攝期間，Selena忍不住跳上架BMWX3，攝記大佬強順水推舟，建議不如影張揸車兜圈相喇！Selena豪氣一句：「好！睇吓會唔會反車先！」說時遲那是快，小記都未坐定，Selena突然飄移王比野哲也上身，彷彿踩盡油門氹氹轉，嗰種離心力又快又急，搞到我要捉實扶手、叉開兩腳先穩住身體！使唔使咁狼呀？諗住係咁意影張相啫！轉圈只短短3分鐘，但足令小記頭暈暈，嚇到花容失色。Selena陰陰嘴笑：「暈未呀？」都係攝記大佬強夠硬淨：「未喎！不過你劈得咁勁唔出得街嘅，嚟多個慢啲㗎啦！」
自言從未試過揸咁大架車出街嘅Selena，繼續NaturalHigh：「架車真係好大，座位又闊落，引擎又好力，一踩油就去，真係快過自己揸開嗰架！不過睇位就未適應，始終大車要啲時間習慣吓。」
女仔都可以做得到
真係諗唔到嬌滴滴嘅Selena，揸起車上嚟咁兇狠：「我鍾意刺激嘛！有啲嘢要夠膽夠放先做得好，唔好以為只有男仔先得！」原來10幾歲喺多倫多，佢已經一次過考到電單車牌：「女仔考電單車牌唔一定輸畀男仔，你越望住個地下就越容易跌倒，望前路反而無咁驚，我就係全憑感覺揸車！」嘩，講感覺咁堅？
玩跳傘、滑雪板、籃球、排球、田徑，Selena讀書時已經樣樣皆能：「點解男仔先玩得，女仔唔玩得？你越話唔玩得我越要玩！係咪任性？唔係喎，人生咁短暫，應該要學多啲，試多啲，經歷先會豐富，人都開心同自信啲，咁先無咁易俾人恰㗎！」原來又係唔想俾人恰，明白！
唔鍾意鄧健泓……架MINI
好少聽到詩韻有緋聞，數嚟數去得個鄧健泓，壓軸話題當然離不開佢喇！詩韻全無抗拒兼且答得自然：「Patrick揸緊架MINICooperS，我知佢好開心買到呢架車，我當然有坐過，佢亦都車過其他人，我覺得大家熟有乜所謂？不過同佢遊車河就未試過。但我嫌周街都係MINI，唔夠個性，所以唔會考慮買。」
新版X3馬力增41匹
不少人也認為，在去年下半年登場的新一代X3，全車多個地方皆與舊版相同，沒太大分別，但車頭燈改為「6眼」設計、全新雙層頭泵把及新款3幅式真皮軚環等，都令新車變得更吸引。此外，廠方為新X3配用的那台3.0公升直6引擎，要比舊款更輕，馬力及扭力輸出更分別增加41hp及15Nm，令車子有更佳表現。
BMWX33.0siA
規格
引擎：2,996c.c.直6DOHC
馬力：272hp/6,650rpm
扭力：315Nm/2,750rpm
傳動：6前速Steptronic半自動波，四輪驅動
查詢：BMWHK（27145271）
$528,000
