美國航空業同汽車業受到競爭者咄咄進迫，業務大受打擊，加上油價高企影響盈利及銷售表現，真箇禍不單行。不過，由《華爾街日報》網上版進行嘅調查顯示，如果要喺航空股同汽車股兩者作出選擇，有份投票嘅2600名網民之中，63%寧願揀航空股。何解？
服務行業競爭大
揀航空股嘅網友wbowen20喺討論區留言話：「美國車廠要面對來自新興市場如中國、印度及其他國家嘅競爭，但航空業喺呢方面嘅競爭相對較少，而且美國境內本身亦有一定嘅需求支持航空業發展。」zace300更批評美國車廠根本冇建造暢銷車嘅基礎！
不過，jebpgh就撐車廠較有前景：「油價高企，航空業嘅邊際利潤不斷被蠶食，油價短期內又不見得會大幅回落，要扭轉劣勢並唔容易。車廠就唔同嘞，佢哋可以透過重組減省開支，又可以順應高油價推出環保節能車搶客，自然可以否極泰來。」
sbanes9002亦認同：「航空業其實係服務業，同行競爭主要視乎彼此所提供嘅航線。但就算開辦獨有嘅航線亦唔代表一定賺，因為航空公司要面對一堆龐大嘅開支，如維修、勞工同油價等成本，無論間公司用咩方法提高競爭力，對手一樣可以照辦煮碗。但車廠至少仲可以改變設計或新增功能等噱頭引客光顧、拋離對手。」
figgio就話：「油價高企對汽車業同航空業其實都冇好處，但我覺得燃油成本上漲對航空公司打擊唔大，因為佢哋可以提高票價。
咪押重注就冇有怕
至於汽車業嘛，政府為咗爭取工會嘅選票，一定會出手幫助車廠度過難關。所以我覺得只要唔係押重注、將成副身家擺落去嘅話，其實兩類股份都買得過。」
然而，亦有人覺得股市兇險，根本玩唔過。rridgeley話：「如果每日金睛火眼昅住個市，或者真係有機會賺到啲錢。不過，畀我揀，我寧願睇長線，每個月都定額投資一筆錢落互惠基金，然後高床軟枕，晚晚都瞓得安安樂樂。」
報料站
歡迎提供網上財經趣聞，資料一經採用，酬100元。請附姓名、電話及電郵地址，交[email protected]