嘩，Cosplay玩埋《變形金剛》柯柏文？非也，用Cosplay形容太睇小佢，呢個老柯Mascot仲曉「變」！唔係講笑，孩之寶為6月1日凌晨（本周五晚）舉行的「MidnightSale」造勢，出盡法寶，搵專人製作咗套老柯戰衣，真人演繹即場變身！《蘋果》讀者有眼福，繼早前獨家試玩後，今日再深入車房基地，搶先試播「港版人肉老柯變身之謎」。睇完記得1號下晝趕去時代廣場，可以同佢影相留念㗎！
記者︰陸俊雄
攝影︰陳盛臣
一比較就知港版人肉老柯係舊造型。電影造型就Cyber好多，貨櫃車身仲有美式噴畫花紋。
「觀眾一定有驚喜」
真人柯柏文Mascot，YouTube上有唔少，但喺香港絕對第一次。網上嘅變完仲識行，呢個就唔得，但有得必有失，外國製作到紙紮車咁，行多兩步都好似就散。未能露面的演員阿威︰「製作的黃師傅真係鬼斧神工，觀眾見到一定好驚訝。」
老柯變身逐格睇
變身逐格睇︰先打開心口，扭腰將貨櫃車頭轉到背脊，成個人坐低，手向身體夾實，斧頭下，腳拉直，完成。
開始變身！
TF會長親自監督
「製作花咗兩個月時間。」今次負責監督整個製作過程的「香港變形金剛聯盟」（HKTF）會長Patrick話︰「最難係諗點樣變，我參考第4代柯柏文的變形系統，花咗1日時間諗變身。」其實上年的變形金剛展覽，亦有內地粉絲製作過一套類似的老柯戰衣，但唔識變身，兼且太焗兼重身，所以Patrick覺得今次最成功係夠輕︰「上年內地粉絲嗰件，穿5分鐘已經想除，今次用一種高密度但輕身的回力膠，穿上去冇咁焗，而且比起日本嗰件更實淨，機械感更強。」的確，外表幾好睇，都要顧及穿上身嗰位演員嘅感受，如果好似廸士尼毛公仔咁，30℃天氣都咪話唔出事。
預告！仲有真人版猩猩叫
老柯頭盔下的阿威，其實已有多次類似經驗，對上一次係國際7人欖球賽時，當中有個印度遊樂會，佢在巨型大富翁攤位內扮棋。不過講到要變埋身，佢話第一次︰「每隔一個星期或10日，我就去黃師傅度試身，唔算焗，仲好輕身，總共試過4次後，成件衫就大功告成，我覺得把槍最正。」由於黃師傅為人低調，所以並未出鏡，但會長Patrick代為解釋︰「黃師傅本身做電影道具的，有15年以上經驗，佢話覺得日本嗰件似小學生勞作，自己拎件玩具研究好多次，先出到呢件最後製成品，所以好有滿足感。佢仲叫大家密切留意另一件星星叫Mascot。」吓！原來唔止柯柏文，連狂派會變戰機的猩猩叫都有，好嘢！
MidnightSale必掃Boxset
齋得真人Show睇？當然唔止，周五MidnightSale當晚才開始發售的限量Boxset（$699.9）和最新玩具今日曝埋光。香港今次真厲害，事關全球限量的100套Boxset，全數只在香港發售。由禮盒開始，本身已可變成基地般的玩具展示枱，等粉絲將最新《變形金剛》玩具擺放出來ShowOff。此外，當中包埋早前介紹過的柯柏文變聲頭盔、一件紀念版Tee、一個金屬水樽，及兩張7月26日的珍藏版電影戲票。
此外仲有紀念封，共3款，在6月2日粉絲只要買《變形金剛》產品滿$250，即可憑單一發票換領其中一款。官方透露，當日會分3個不同換領時段，所以粉絲買玩具時最好分3張單，留意住稍後公佈的時間，一次過換齊3款。至於最新玩具，繼3吋和7吋之後，再有外形大小小的新品。有大黃蜂的手辦、大黃蜂同老柯的變形Q版公仔，及電影中會出現的角色，如預告中好有霸氣的直升機黑狂等。
