１）今周出擊，兵分兩路，主打利記（637），側敲中國星（326）。
先由中國燃氣（384）講起。FollowMe06年底揀中燃為「07年之星」，由1.55元起步，升至上周三最高2.52元，大漲63%，超越中短線目標2.50元。
FollowMe狗年歲晚推介利記為「蛇年之星」，大年初七即升到3.56元，經3個月橫行鞏固後，上周二又升到3.57元，比推介時2.84元，只升26%，比目標價5元仲有大把上升空間，正式係大利當頭。
盈利增長爆燈
利記1947年成立，預期60周年紀念大送紅股，結果管理層認為派特別股息0.10元，更加實惠。如此照顧小股東，值得大讚。
能Run一間公司60年已經唔易，要年年盈利穩增，更加難得。呢個管理層，信得過。主席陳伯中上周一在周年晚宴上，再三強調其營商宗旨「信守合同，優質保證，服務承諾」，博得全場掌聲。其理念一旦獲得基金認同，肯識於微時（股價進入長期升軌之前）而入股，其未來升幅，唔講得笑。
睇好利記有數得計，06年度（12月年結）賺3.89億元，增92%，大過營業額增幅76%，表現出色唔在講，而且超出過去5年複式增長48%達44個百分點，靚爆鏡程度，實在毋須再錦上添花。
利記往績PE只有5.6倍，無論以金屬貿易股五礦資源（1208）7.2倍比較，或採礦股湖南有色（2626）31.3倍比較，都係極度偏低；PE若跟貼五礦，值4.25元，追上湖南有色，可見19元，升足4.8倍！當然唔可能追上湖南有色。
有權翻一番
利記經營鋅錠及鋅合金等有色金屬貿易，由美英加澳等地入口，再銷往大中華市場逾1200客戶，近年且集中在內地市場，處境之佳，不難想像。預測07年度盈利再增50%而達5.84億元，每股盈利0.704元，PE僅4.7倍，越計越抵買。就以PE上到10倍計，股價已經有權翻一番過外。
目前要搵一隻低PE又有良好基礎、美好前景支持股票，的確不易，咪錯過。
高彰坡