藥業股利君國際靜靜起革命，嚟緊一年半陸續有新產品推出市場。主席吳秦話，其中最有潛質嘅「升態口服液」，08奧運國家選手已經飲緊，估計明年正式面世。
「升態口服液」有沙棘、奧米加等成份，具有「恢復疲勞、對抗衰老」功效，入口感覺有少少似酒味，不過，吳主席話平時唔飲酒嘅人，反而會好鍾意飲，仲讚呢隻產品前景非常好。雖然298蚊人仔只得10支，價錢唔平，但係佢話效果好就乜都值喎。
執靚成份再推出
呢隻口服液原來有段古。吳總最初係研究飲品，做有啲似可口可樂嘅碳酸飲料，再加朱古力口味同埋屬於低糖嘅木糖純（代糖一類嘅嘢），諗住實掂。不過向阿爺申請批文，阿爺就覺得有啲無厘頭，畀咗兩條路佢揀：一、大量生產成為一般飲品，即係三個半人仔，就有500毫升嗰類；二、正正經經做保健產品。
吳總計過條數，當一般飲品要30蚊人仔200毫升先回到本，成本太高，惟有再執靚成份，成為就快面世嘅「升態口服液」。可惜華華見吳總嗰一日，產品未面世，華華都想試吓呢隻口服液，係咪真係咁掂。
[email protected]