兩鐵新附例話講粗口要坐監,即時搞到輿論嘩然，是否罰得過重有待大家去討論，不過喺公共交通工具上，神憎鬼厭無公德嘅行為又真係比比皆是，睇到你眼火爆！今日就數臭8大乞人憎行為，希望罰則加埋輿論壓力，可以令呢班缺德人士收斂一下！再係咁嘅話，兩鐵一合併，肯定罰得仲甘！
記者︰劉昱蘭
攝影︰何家亮
Models︰Ryan、Helena（IG綜藝社群）
小心破財
其實巴士同地鐵都有明文規定禁止事項，一般不准飲食、不得帶大型寵物呢啲就係人都知，但係有啲行為原來都唔允許，好似地鐵附例裏面，我哋就搵到啲值得提醒大家嘅地方，亂咁嚟，隨時破財！
小朋友唔縱得
地鐵附例中有一條，係講明「不得將腳放在座位上」，違者罰$2,000，兩鐵合併後更建議加至$5,000。地鐵方面講明，罰則適合所有年紀的人，一眾隨便畀小朋友企上座位嘅父母都係教吓啲小朋友啦。
扯火1 着住對鞋踩上凳
呢啲事喺地鐵同巴士都經常發生，座位俾人踩到污糟晒，其他乘客懵懵吓，坐咗落去都唔知，你話係咪勁缺德？巴士嘅對頭位係重災區，無論阿叔定𡃁仔，不時都鍾意戙起隻腳扮大爺。地鐵就重慘，尤其到咗架空路段，不時都會見到有𡃁仔，踩住凳睇街，甚至開心到又行又跳！最令人扯火嘅係唔少缺德父母縱容呢啲行為！細路隻鞋咪同大人一樣行咗咁多路，乜垃圾都踩過晒，其他人坐落去同坐地下有乜分別？
扯火2 打機嘈到癲
唔少人喺車廂內大聲講電話，完全唔使停口，都已經夠惡頂，不相伯仲嘅重有一眾罔顧他人感受嘅機迷。鍾意打機本來無罪，弊在有啲人開到大大聲打機入晒迷，簡直目中無人！NDS都無咁嘈，最怕係PSP，真係成車人被迫陪佢打機。
扯火3 逼你睇報紙
喺繁忙時間咁嘅行為就最唔要得，有啲人掛住打開份報紙睇，小記生得比較矮，成日奉獻個頭畀人放報紙，佢揭一版就掃我一下，真係多謝晒！生得高一樣難受，成份報紙貼住塊面咁滯。好心喇！睇少一陣唔使死嘅，咁逼法其實都睇得唔舒服喇係咪？
扯火4 霸住成條柱
呢個係地鐵常見惡行。攰攰哋冇腰骨係人之常情，不過都要睇吓環境。非繁忙時間鍾意點企唔理你，但逼到爆嘅時候，好人好姐都要挨住碌柱，會搞到身邊起碼5個人隻手唔知扶邊好！再乞人憎啲都仲有，就係唔理柱上已經有幾多隻手，都一於照挨，當你透明壓落你隻手度，真係嬲死人。
扯火5 眾目睽睽剪腳甲
近期搭巴士發現一樣新興行為——剪指甲，連嗰10隻指甲都懶得喺屋企剪要自己執，諗住喺車廂彈去邊都有清潔阿嬸搞點。自稱身處國際之都嘅香港人真係可以咁無品！真係一聽到嗰啲「啪啪」聲就嬲！有時仲要完全唔顧儀態，戙起隻腳當眾剪腳甲！一個不留神，俾佢啲指甲彈到正，真係嚇到毛管戙！
扯火6 亂塞垃圾
我相信，只有小朋友坐巴士鍾意坐窗邊位，唔知各位有冇留意，窗口邊同座位間嘅罅隙，早就成為熱門垃圾桶！報紙、飲品盒、食物包裝袋……應有盡有，最恐怖嘅仲係香口膠，坐到正點算？講到尾，有邊個鍾意坐喺垃圾桶邊？
扯火7 電梯左右照企
「左行右企」早就係搭扶手電梯嘅不成文規矩，唔少人都會遵守。唔急都唔會跑扶手電梯啦，趕起上嚟，遇正有人塞住晒，真係急死人。尤其港島線啲電梯長到爆，前面就成堆人左右塞死晒，叫人讓路都叫到扯火，個人會好躁。
扯火8 食嘢全車飄香
小記家在屯門，將軍澳打工，好明白搭個幾鐘頭車但餓住個肚嗰種辛苦幾難頂，所以有時見到長途車有人食嘢，都可以體諒。但食塊餅咬個包都算，搞到食飯盒呢啲又香又多汁嘅嘢就好離譜！整污糟地方唔在講，搞到全車都聞到，煽動食嘢情緒，你話幾慘。
乘客㷫爆實錄
Judy:有次搭地鐵，突然見到個操不純正廣東話嘅女人叫佢個仔喺車廂內「口殊口殊」，就喺門旁邊嗰塊玻璃下面。嘩，嗰刻所有人都呆咗，不過當然係敢怒不敢言！後嚟嗰堆液體仲隨住車廂搖動而係咁流……
Winne:嗰日係繁忙時間，有個阿叔坐喺地鐵車廂內食橙，啲橙皮亂咁掉落地。食完之後成手黐𣲷𣲷，就係咁抹落條扶手同張凳度，然後就施施然落車，真係見到都想打！
