可能巧合到無人信，一切都是由一個無聊的email開始。
今年3月，我和老公準備5月初到挪威北部的Lofoten，所以隨意email到其中一間「旅館」——ARORBUER,LOFOTENISLANDS，問吓佢5月初開始營業未啦（要知道，在挪威，很多旅遊設施都是到五月底才開業的）；同時我亦多口問吓可否簡介一下LofotenIsland。怎知，過了兩天，我收到一個長途電話，來電的竟是ARORBUER的老闆Sigurd！喂，一條咁簡單的問題，使唔使打長途電話咁大陣仗啊？
撰文：王佩珊
攝影：蘇傑榮
巧合遊香港 坐低慢慢傾
原來佢話，收到我的email，而又巧合地，佢數天前，剛報了名參加當地一個會途經香港的中國旅行團，所以想……唉……這個女子的問題咁大，不如大家坐低見過面才慢慢講吧！所以佢就試吓打個電話畀我，睇吓我會唔會睬佢，同佢meetup，咁佢畀啲料我，我又畀啲料佢，咁就大家都可以「旅途愉快」！
結果，出現的Sigurd是個60多歲的伯伯，好有趣、健談，仲好有背景，佢從前係一家金融機構顧問，現在退休留守家族度假屋生意！我請佢去飲酒，大家一見如故！最後佢話如果我去Lofoten，佢會以youthhostel（$194/person）的價錢，讓我們住進一個Fisherman'sCabins（rorbuer）（$1,559）！以多謝我的熱情款待，嘩！太吸引了！於是一個月後，我們終於去了挪威！
第一次出海釣魚
銀鱈魚隨時上釣
5月11日晚，我哋在Moskenes一落船，就見到Sigurd！哈！佢真係無唔記得我喎！Aspromised，佢就在碼頭接我哋。並招呼到他家裏坐，繼續我們一個多月前那未吹完的水。
到了第二日，佢就親自帶埋佢個guide阿Fred和我們出海釣魚了，也是我們的第一次呢。Sigurd臨出發前話希望我哋釣多啲嘢返嚟食喎。我就報定案，話我哋只喺香港釣過墨魚咋……
點知，哈！出海無幾耐，Fred就有魚上釣！仲係大大條的銀鱈魚（唔係油魚！）！蘇醫生之後仲連下兩城㖭！嘩！大家都好興奮！我們全船共釣了4條銀鱈魚和1條比目魚呢！Sigurd都好開心，佢話佢都好耐無出去釣過魚，今次仲係佢親自開船㖭！
之後我哋當然即時煮銀鱈魚柳來吃……不過……唉……挪威的加鹽加醋白烚魚，真係嘥料。不過係自己釣，加埋剛剛上釣，超新鮮，都算回味無窮！
生活好簡單但滿瀉驚喜
以往從未試過認真地出海釣魚，在挪威這個超寧靜、山光水色一流的地方，靜靜地釣吓下魚，先知咩叫做寫意！Sigurd說Lofoten的生活好「簡單」，冇得蒲、冇得shopping，但我哋一啲都唔悶，除咗釣吓魚，行吓山，或者好似老公咁喺露台爆吓機（手機）聽歌，甚至好似我咁去個dock八吓其他人釣到幾大條魚；然後邀請Sigurd到cabin食飯，佢帶來靚膏蟹、紅酒洋水仙送畀我！哈！生活仍然充滿驚喜！
臨走前，Sigurd話：「HopethatyoudonotregretcomingtoLofoten！」當然not啦！這真是我們全程最開心的日子！佢唔知道我哋喺香港，一個月幾難先「度」到時間一齊去行山，對住個大海乜都唔使做！我哋話明年會再去探佢，用Lofoten的MidnightSun來慶祝我們結婚十周年紀念！
剛剛回來這幾天，空氣還好像有Lofoten的漁村味，老公話：你掛住人哋啲人情味至真！
旅遊資料
ARORBUER,LOFOTENISLANDS
地址：AiLofoten,N-8392Sorvagen,LofotenIslands
電話：47-76091121/76091162
電郵：[email protected]
交通：由挪威奧斯陸可乘內陸機到Bodo再轉乘3個半小時OVDS渡輪到Moskenes。ARORBUER離開Moskenes約5分鐘車程。
作者小檔案
王佩珊（鴨仔）、蘇傑榮（蘇醫生），男的是西醫，女的是中醫，兩個三十來歲但愛玩愛笑愛遊歷的淘氣小夫妻，完全是鬼馬大細路。
平日除睇症、養狗，就是喜歡去旅行，曾經為《飲食男女》旅遊版設計行程，帶他們遊印度、西藏、尼泊爾。他們每年揹住背囊，去不同特色的地方體驗，可以住皇宮，可以瞓機場，最緊要開心！