一直聽人講深圳機場搭白牌車去皇崗、羅湖，啲司機開價好鬼狼，如果上錯賊車，可能連命仔都冇埋。所以我喺大陸一定唔會坐白牌車，寧願貴啲坐的士，睇錶畀錢。點知我呢條防線竟然失守，不幸中之大幸係仲返到嚟寫Blog。
話說上周末晚10點幾，我哋一行三個靚女喺深圳落機，即刻趕去的士站想搭車去皇崗，點知有幾個身形魁梧、操普通話嘅男人，一手拎住我哋嘅行李，話幫我哋拎上的士，行吓行吓，竟然帶咗我哋去搭白牌車。
四圍黑麻麻，咁嘅環境惟有焗住上，個司機仲獅子開大口要收300蚊，我哋死都跟市價叫價120，嘈咗一輪佢先屈服。一上車就知弊傢伙，佢首先發難話架車入唔到關口，去到關口附近要我哋轉乘的士；跟住佢駛到一條高速公路突然停車，話搵架可以入口岸嘅的士，但又話搵唔到的士，要收150蚊先肯載。最後，我哋卒之屈服，畀咗150蚊，並成功轉搭另一架的士。今次呢個經驗認真令人怕怕，所以奉勸各位姊妹，由深圳機場去皇崗最穩妥嘅選擇，都係機場巴士。
逢周一至周四刊出