昨凌晨喺長洲搶包山比賽嘅21歲女將鄭麗莎Lisa極速掃包,總共擸咗53個9分包、幾個3分同1分包,雖然三甲不入,但都唔比其他筋肉男輸蝕,喺12個選手中攞第六名;由於佢係唯一女將,加上眼仔睩睩唇厚厚,戴埋耳環同着緊身小背心上陣,成為全場焦點,成個盜墓者羅拉咁款,賽前賽後都被大量鏡頭瞄準,搶鏡方面輕易摘冠,冇人夠佢揮。
比賽輸在唔夠貪
Lisa話搶包山秘訣得一個字:「貪」,因為個個包都計分,唔夠人搶最矜貴嘅9分包,3分包都應該照擸,佢比賽時就係衰唔夠貪心,只掛住攞9分包,如果有理冇理狂掃3分包,應該可以有高啲名次,佢話下年會捲土重來,誓要做第一個「女包山王」。
講「掃包」眉飛色舞,Lisa「盜包」手風就認真唔多順嘞,佢靜靜雞同八方講,前晚比賽後,諗住攞番啲平安膠包,送畀親朋戚友留念啦,點知大會工作人員眼利昅到,要佢「嘔」番啲包出嚟,小妮子唔係幾忿氣,「要交番啲包出嚟,真係有啲掃興﹗」
八方見Lisa身形高䠷、骨骼精奇,原來佢9年前12歲就參加社區中心舉辦嘅攀爬班,自此瘋狂愛上呢種挑戰自己極限、意志力同體能嘅運動,𠵱家每星期練四至五次,每次三小時,準時過食藥,先至鍛煉出一身好武功。佢仲係06年世界盃運動攀登女子速度賽冠軍,「其實一般女仔參加搶包山好輸蝕,我勝在有九年攀爬經驗,先至冇咁蝕底。」
要做全職運動員
喺長洲比賽完,Lisa急急腳離開,原來佢噚日朝早要考試,佢喺柴灣專業教育學院讀有關體育嘅高級文憑,仲有一個月就畢業,由於要抽時間刨書,所以搶包山前都冇乜時間練習。Lisa好老實講,自己細個時無心向學,會考成績麻麻,「喺正統教育下唔能夠帶來成功感」,於是只顧住玩。不過,人大咗,成日要出外比賽,就知道讀好書、學好英文好重要,理想係成為一位全職攀爬運動員,代表香港到世界各地出賽,佢下個月就會去蘭州參加攀岩速度賽。咪睇Lisa四肢發達,頭腦都唔簡單,佢仲好貪靚,閒時鍾意同朋友行街買衫,「自己其實鍾意sporty嘅打扮,但都鍾意着裙。」好動又識打扮,呢類女仔都相當有市場,不過佢已經名花有主,各位死咗條心啦!