6年前因為瘋牛症，你悄然揮別了香港市場，然而你的油潤滋味、於舌尖綻放如雪的溫柔口感，依然殘留我們心間，久久不散。這6年間，我們邂逅過和你長得相似的澳洲和牛，也試過跑去日本找你，但每次想起我們相隔這樣遠，再多的思念都不能留你在身邊，總不由得令人感歎天意弄牛，人生奈何。6年後你終於回來了！謝謝你帶來令人難忘的最新刺身食法，Wagyu（和牛）！
記者：劉嘉蕙
攝影：周旭文、楊錦文
Model：Tiffany（TheGroup）
名人食家自選最正和牛食法
李純恩 鹽煎
和牛刺身口感似Toro，喺屋企唔好亂整，我個人鍾意食西冷，簡單加鹽和胡椒煎一煎就好好味。以前喺日本有人帶我食過前澤和牛，話係頂級之中嘅頂級，味道固然係好，不過其實掛個名牌撈亂晒，都分唔出邊隻打邊隻。
囍宴私房菜老闆JackyYu 炒飯
我試過最正做法係將食剩和牛油份煎亁，變成油渣，切成粒粒，再灑鹽、胡椒等炒飯，粒粒飯都有和牛油香，和牛精華完全收晒喺裏面。
食家蔡瀾 炭燒
食和牛最正係炭燒，不過每人生熟喜好不同，最好自己買返屋企整，第一次先切成一條條試驗，搵出最鍾意的味道。冇咁多時間的話，可以切粒，煎熟四邊食。
不同部份最佳食法
1.西冷：肉味較濃，做扒，以鹽燒最佳。
2.肉眼：脂肪多，做刺身、扒最佳。
3.大髀：薄燒、壽喜燒。
4.膝蓋：火鍋（ShabuShabu）。
5.肩：脂肪少，適合切片做壽喜（Sukiyaki）。
酒店級和牛
香港洲際酒店旗下扒房TheSteakHouse同日本餐廳NOBU率先推出幾道和牛菜式，31日起有得食，所有菜式暫時未定價。
炙和牛50克
NOBU的師傅將和牛面層稍為煎香，混和薑、蒜、洋葱、辣蘿蔔茸點豉油食，比單食刺身香口，頂級A5和牛入口軟綿，好似食緊魚生，又有好似篤BB仔面珠登嘅感覺。
新式和牛刺身50克
呢個係NOBU特地為日本和牛打造嘅新刺身餐單，以熱橄欖油輕灼肉面，再淋上柚子汁、薑葱、麻油、日本豉油及芝麻做嘅汁，薄切刺身配上微酸醬汁，蕩漾清新又高貴口感。
和牛陶板燒50克
喺NOBU睇住和牛由生轉熟，白色嘅雪花變成油香，令小記有種突然嘅感動。熱食和牛更充份突顯其油份有幾咁飽滿，牛味唔算濃，但肉汁縈繞口中不散，食幾件令人覺得幸福，食幾碟可能會覺得好膩。
NOBU（27211211）
地址：尖沙嘴梳士巴利道18號香港洲際酒店2樓
營業時間：12:00nn-2:30pm、6pm-11pm
炭燒12安士西冷及牛柳
TheSteakHouse的西式炭燒啖啖肉，西冷扒簡單灑上海鹽及香草，以炭爐烤至4成熟，和牛雪花遇熱瞬間溶化，油份包裹肉身，毋須調味，拮把刀落件扒度已經感到有幾嫩滑，放入口極度鬆軟。
TheSteakHouseWineBar+Grill（23132323）
地址：尖沙嘴梳士巴利道18號香港洲際酒店地庫
營業時間：12:00nn-3pm、6pm-11:30pm
和牛2食
MrSteak用得A5級鹿兒島黑毛和牛，牛肉靚，所以毋須特登溝汁醬調味。所有西冷及扒類全部只係落鹽同胡椒煎，等大家嗒出和牛真味道。
MrSteak
地址：灣仔港灣道28號三里屯1樓10號舖（28021128）
營業時間:12nn-12mn（旺角及沙田分店亦有供應）
和風自助餐
想一次過食晒幾款煮法嘅和牛，MrSteak賣大包做和風自助餐，有齊漢堡、壽喜燒及刺身等和牛菜，一張大牛有找都算好抵。不過食家李純恩提醒，和牛好味但好膩，各位去食Buffet每道菜淺嚐一兩片就收手，唔係第二日見到乜牛都唔想食。
MrSteakBuffetalaMinute（28815757）
地址：銅鑼灣百德新街2-20號恒隆中心3樓
供應期：即日至6月10日
收費：
星期一至四 成人$328 小童$209
星期五至日、公眾假期及假期前夕 成人$338 小童$219
鹿兒島牛先來港
其實日本領事館喺4月尾已經宣佈恢復日本和牛輸港，首批解禁牛由鹿兒島兩個廠房供應，不過由於供應未算穩定，香港市場暫時處於觀望態度，據悉政府食物安全中心目前接到申請唔多，主要來自大酒店及高檔超市。
MrSteakConcept集團係首批引入解禁牛嘅供應商，創辦人鄺大華話：「今次日本方面好有決心重新打造和牛殿堂級地位，所以冇A4-A5級都唔俾過嚟，平均喺40隻牛入面可能得4至5隻夠資格，非常珍貴。」
和牛好味之謎
傳說日本和牛之所以好味，在於佢自細食好住好，日日做Massage又隊啤，今趟日本和牛恢復輸港，鄺大華親身走去鹿兒島視察牛場，仲請牛農破解有關和牛3大謎團。
1.和牛日日做按摩？
冇！牛農話佢哋只會得閒掃吓隻牛，好似一般人養狗咁拍幾下，稱不上係按摩。鄺大華仲話，聽啲牛農講，佢哋話養牛冇秘技，只係憑愛，當正隻牛係親人咁相處就得喎！
2.和牛飲啤酒大？
差少少。牛農唔會灌和牛飲啤酒，不過會喺飼料入面加有啤酒渣，另外仲有粟米、番薯、穀物等，因應不同地區，飼料成份有出入，例如鹿兒島多啲番薯，所以影響到牛肉味會甜啲。
3.不同地區和牛有分別？
食和牛大家諗起最出名有神戶牛、松阪牛，甚至三田、米澤牛等，不過鄺大華話：「和牛係咪屬於頂級，係睇番牛種本身，並唔係睇地區。至於點解神戶、松阪牛特別出名，好大部份係因為當地人比較識宣傳囉！」
