細細個已經封變形金剛柯柏文做偶像，覺得佢可以一路狂奔一路變形嘅行為，確係型到爆！今時今日，終於遇到呢部滿足我兒時憧憬嘅OpelAstraTwintop，3段式篷頂開合變形時極度有型，最搞鬼係學柯柏文咁邊跑邊變，遇着驟雨亦可以喺20秒內迅速關上篷頂，就算遇着如近排般時晴時雨嘅天氣，都毋須停埋一邊關篷咁𤓓！
記者：周達之
攝影：陳偉強
模特兒：Scarlet
變得巧妙複雜
咪以為AstraTwintop行住變形好Easy，事實上3段式摺合比一般開篷車更巧妙同複雜，幸好整個變形過程僅需20秒，遇着驟雨都關得切個篷。
3段式收合 又型又慳位
一入到Opel喺灣仔嘅陳列室，小記已經忍唔住手多多要搞佢個3段式電摺硬篷頂，單睇佢巧妙嘅支架伸嚟縮去、左開右合經已值回票價，而小記覺得呢個3段式設計同BMW嗰隻好相似，比起一般2段式，3段式摺合時可以更慳位，更唔會搞到車尾鬼咁長、咁核突。
AstraTwintop嘅車頭，依然繼承咗家族式向前端收窄嘅三角形線條，而鬼面罩同下面嘅入風口都加咗四方網格，睇起上嚟多咗啲跑味。成部車亦都畀人一種好紮實嘅感覺，例如厚厚重重嘅車門同車窗玻璃；無辦法，因為Opel為咗保持部車嘅剛性，所以一定要喺車身度落足料，令到片彎嗰陣仍然剛度十足。
鋼琴面中控台豪得有型
揸開篷車嘅好處係咩？咪係就算得兩道門，上落後座仍然非常輕易，而且佢嘅前座只要拉一拉椅枕旁嘅把手，就可以輕易咁摺合拉前，再向後一拉又會回復原貌，就算唔係開篷狀態上車亦好輕鬆。一望個中控台，赫然發覺又係用咗小記最鍾意、黑色反晒光嘅「鋼琴面」，哇！多漂亮！按鈕編排得簡潔，但最欣賞嘅係佢嘅CD機可以播放儲存喺CD裏面嘅MP3歌曲，軚盤上面仲有埋控制音響嘅按鈕，聽歌極方便。
另外，仲有唔少高級得嚟又實用嘅設備，例如自動開關頭燈、自動水撥、自動防炫後鏡等等；之但係咁，本來覺得採用皮椅係一件好事，不過喺陽光普照嘅今日，就發覺凡事唔係絕對，皆因黑色皮椅都頗吸熱，開住篷嚟跑就連帶冷氣都要開大啲，對於小記呢種算死草人士嚟講唔係咁Happy，不過買得開篷車嘅人，睇怕都唔會好似小記咁孤寒……
運動模式 一樣咁悠
AstraTwintop嘅性格，就好似我哋嘅專欄坐館悠穎馳咁，夠晒滋油淡定，雖然佢都有SportMode，但設定就只係小辣；記得上次介紹嘅Astra1.8，佢嘅SportMode設定差唔多到6,000rpm先轉波，但呢部AstraTwintop就喺3,500至3,800rpm左右。咁都啱嘅，因為坐開篷車都係享受悠閒感覺，玩到咁高轉為乜？而且AstraTwintop用咗SportMode後，油門同軚盤會敏感啲，揸起嚟都爽啲。至於懸掛設定亦係咁悠閒，比較偏軟，行起上嚟都舒服啲。
行家點睇
「以車論車，呢部AstraTwintop用料一啲都唔差，而且可以喺時速30km/h之下開關篷頂，即使遇上落雨，都唔使好似某啲牌子嘅開篷車咁，要泊定部車先可以開合，啱晒近排時晴時雨嘅天氣用。」
型男辣妹力谷AstraTwintop
Opel搵嚟一堆型男同辣妹，為AstraTwintop拍硬照同電視廣告，睇佢陣容已知廠方對新車幾咁重視。
新車速蘋
ν開篷後既能令賣相變得有型，車身嘅剛性都沒因此而減少。
ν車廂設備齊全，乘客嘅乘坐空間也見充裕。
ν懸掛設定軟硬適中，喺任何路面行走，乘客都唔會投訴。
x中控台設計望落老咗啲，同佢嘅年輕個性不太相襯。
x開咗篷後，請別奢望尾箱可容得下你帶來嘅多件大型行李。
規格
引擎：1,796c.c.直4DOHC
馬力：140bhp/6,300rpm
扭力：175Nm/3,800rpm
傳動：4前速自動波
尺碼：4,476×1,759×1,411mm
軸距：2,614mm
車重：1,428kg
售價：$299,800
查詢：合朗汽車（27608668）
同級之選：Peugeot307CC
來自法國的悠閒舒適開篷車，有同AstraTwintop相近嘅馬力輸出外，售價都只係相差5千元，要二擇其一？真係要花啲時間考慮先可以做決定。
Peugeot307CC規格
引擎：1,997c.c.直4DOHC
馬力：143bhp/6,000rpm
扭力：200Nm/4,000rpm
售價：$293,800
查詢：法國汽車（31181828）
