時間：96年1月
人物：鄧萃雯、江華
地點：清水灣鄧萃雯寓所
經過：近日喺《師奶兵團》做正氣師奶嘅鄧萃雯，11年前曾經被傳介入江華同麥潔文嘅婚姻。96年1月，雯女同江華合作拍攝亞視劇集《我和春天有個約會》期間被傳撻着，有雜誌影到江華喺雯女清水灣屋企出嚟嘅相，話江華喺雯女屋企過夜，事件曝光之後，雯女、江華同麥潔文齊聲否認，話雯女有時唔識去外景場地，或者拍劇收工夜得滯，江華先至充當司機包接送。
不過，當大家以為事件告一段落之際，同年6月，雯女主動同傳媒大爆連續幾個月俾人電話騷擾，矛頭直指麥潔文。事後麥潔文捉埋江華開記者會反擊，話雯女同江華為《我》劇開記者會當日，一見江華即刻捉住佢隻手撩佢掌心，又鬧雯女借佢老公宣傳，又暗指有人因為求愛不遂報復。雯女知道後還擊，話要做宣傳都搵個紅啲，仲攞埋一封同麥潔文字迹好相似嘅信出嚟，話有人寄咗封有關佢同江華緋聞報道嘅匿名信畀佢，唔知對方有乜嘢居心。雙方先後講到眼濕濕，話要打官司告對方誹謗，最後都冇晒下文。
呢件事令雯女沉靜咗一排，但估唔到04年佢憑《金枝慾孽》如妃角色人氣勁升，仲紅到發紫，相反江華離開無綫之後，好似人間蒸發冇晒聲氣。
本欄逢周一至周六刊出