台灣隊「飛輪海」搞到女Fans尖叫，日本都有「飛輪」，不過係搞出人命嗰隻！早前有部三菱大型貨車飛咗個車輪出嚟，壓死一名29歲婦女，結果三菱自動車工業嘅前市場品質部長同前組長，被控以業務上過失引致他人死亡而要坐監。
咁都未算，隔個禮拜之後又睇見單新聞，話上年日本因汽車出現問題而要回收嘅數目，單係日本已達到696萬部，係有史以來第二高！仲未算，隔咗幾日之後又有單新聞，話各大日本汽車生產商，今年紛紛增加回收車輛修理時所需要嘅儲備金，豐田增加數百億日圓、本田增加1.5倍、Suzuki增加1.3倍、萬事得增加1.4倍。
從以上幾單新聞，悠穎馳可以得出一個結論，就係家陣汽車嘅優良率有下降嘅趨勢，即係買到有問題汽車嘅機會增加咗唔少，所以大家都唔應該抱住百分百信晒車廠嘅心態，最好都係勤啲檢查吓部車好！
悠穎馳
豪邁不羈，愛車如命，聽幾下引擎聲就知咩車！