球場上乜都可以發生，噚日喺小西灣運動場舉行嘅「回歸十周年足球四角邀請賽」，香港立法會議員同官員組成嘅「立政隊」，初賽對住人強馬壯嘅澳門名人隊，論身形、計年紀、講腳法，港隊瓣瓣差一截，未開波已經輸氣勢。
領隊陳智思採取穩守突擊嘅戰術，但求輸少當贏，守到下半場終於有機突圍，機場警區指揮官呂漢國靠陳偉業開路，起腳出個高飛曲墜球笠死對方龍門，結果一比○完場，港隊爆冷贏波。呂Sir成為入波英雄，有份落場嘅一哥特警成都讚佢幫到手，塘邊鶴肥仔明話呂Sir守機場，見慣聯合國旅客，真係過江龍剋星。
澳門名人隊輸波，團長姍桃絲冇晒心機，佢話隊波幾個月前已經開操，一星期練兩次，諗住港隊係「魚腩部隊」，頭10分鐘就會有入球，預計最少數兩粒，點知反而輸凸。澳門隊輸波唔少人跌眼鏡，八方聽聞原來呢班馬交朋友平時習慣喺有蓋場練波，噚日露天作賽，曬到暈邊有力踢？姍桃絲就賴天氣又熱又潮濕，港隊有天時地利先贏啫。
決賽打和雙冠軍
立政隊贏開有條路，決賽對廣東社團總會亦冇失球，keep住○比○完場，雙冠軍和氣收場；澳門名人隊轉頭就狂數駐港領事隊五比一，攞番個季軍當安慰獎。同場仲有四角聯隊同香港女子奧運足球隊踢表演賽，四角隊狂吞六蛋，完全冇得鬥。