行路經過渣打銀行，碰到資深大經紀Ｍ。經紀Ｍ真好嘢，入行三十年，久歷風霜，遇上八七股災，佢間公司沒頂，經紀Ｍ一個鯉魚翻身，又係一條好漢，現於巨型大行做到極高層，經驗豐富到極。但係佢個樣貌基本保持不變，笑容仍然純真，唔到左丁山唔服，佢話做多兩年就退休，夠晒皮囉喎，退休後就更多時間去打波，去馬場啦。
問經紀Ｍ大市點睇，佢話內地炒民唔多畀面中央，佢收到上面嘅訊息：內地股民繼續推高股市，監管人唔多高興。左丁山話：「登記股民有九千三百餘萬，項懷誠話已經去到一億，中證監主席尚福林就話活躍嘅有三千萬人，中央點可以一紙命令就指揮到三千萬人呀，市場經濟愈發達，指令經濟愈是不行，已是君令不出都門，好難搞。」經紀Ｍ話：「唔係㗎，上面唔高興，可能會出一劑瀉藥，小小懲罰不可避免。最近兩位大富豪出聲唱淡，未必無因。」
股市狂升之後，必然大跌，花旗出報告話上海綜合指數嘅走勢與升幅，與九七年前嘅紅籌指數極其相似，如果歷史重演，今年八月就會見到Ａ股大跌，信不信由你！經紀Ｍ素來消息靈通，既然上面有人唔高興，睇吓又會出邊招。
凡股市興旺，必然有一次大跌市，令投資者受到教訓，以後先至會小心從事。美國有一九二九年大崩潰，香港有一九七三年千七點崩圍，跌到七四年年底一百五十點（跌足百分之九十二，好多人翻唔到身），日本喺一九八九年創歷史高位，日經指數去到三萬八千幾點，最低去到七千幾點（跌咗八成），到𠵱家仲未去番一萬八千點，邊個話十八年後又一條好漢？台灣嘅加權指數在八十年代後期大漲，最高去到成一萬三千點，後來大瀉不止。十幾年後，二○○七年五月二十三日收市報八二二一點，返家鄉不知何年何日。中國股市遲早會跌一鋪勁嘅，跌完之後希望學香港，可以升完又升，學日本、台灣就杰咯。至於Ａ股幾時跌，冇人敢講，大家綁緊安全帶。