前排放假喺屋企執屋，除咗執番嗰啲自以為唔見咗好耐，但原來一直喺視線範圍以內嘅DVD同CD之外，仲執番好多舊車嘅Catalogue出嚟，最令我驚喜嘅，就係呢本大Size嘅Mazda121Catalogue！
記者、攝影：鄭達基
講真，如果你問番我呢本Catalogue，究竟係產自日本定香港又或者係歐洲，其實我真答唔出，事關由到手至家陣都有超過10年，所以唔記得都係正常嘅！
家陣拎番呢本Mazda121嘅Catalogue嚟睇，覺得啲車廠以前影嘅相同鋪排都唔錯；就好似呢本咁用咗一部FunTop軟篷頂來貫通封面同封底，然後入面再好詳細咁介紹部車。哈，睇番先知原來2.5箱式嘅121，原來係可以放兩個大型行李篋同埋兩個手提行李袋，真巴閉。引擎就係一台可輸出75匹馬力嘅1.3公升直4引擎，波箱就有5前速手波或者4前速自動波你揀，真係照顧周到；但我最Buy嘅都係FunTop軟篷頂設計，而且將篷頂停喺邊可由自己決定，都OK㗎！睇完之後，突然有股衝動去買番部㖭！
