星期一講「通識教育」，引來一位中大九二年商科畢業生傳來電郵。呢位男讀者話佢今日打工，一切都幾好，不過當年佢修讀嘅商管課程、理論，已經統統送番畀教授，唔記得晒咯，所賴以在商界搵食，而且搵得幾好嘅功夫，全部係在當年所修讀嘅通識課程而來嘅，故此佢寄語今日嘅學生，修讀通識課程，不能輕視，最好就係讀多啲。
讀者話佢印象最深嘅通識課程係李國章教嘅一科「外科」，李國章首先播出車禍傷人嘅真實慘烈錄影帶，學生嚇到不忍卒睹，然後李國章逐步介紹救人手術。讀者講起李國章，令左丁山想起中貿林講過一個故事，話李國章喺第一堂話要試吓學生嘅味蕾，請學生飲嘢。飲乜嘢？人體排洩出嚟嘅液體也！中貿林講得出，左丁山照寫，或者李教授嘅學生可以提供資料。
李國章甚為好玩，言語不禁，講中文、講英文，可以同樣引到滿堂大笑，相信冇一位立法會議員講得有佢咁醒。佢做中大校長之時，某一次與宿生夜話，問學生識唔識「床下底破柴」、「非洲和尚」呢類俗語點解，現在啲學生未見過燒柴，竟然唔識，畀李校長取笑，點知學生玩番佢，問一條IQ題：「黑社會最鍾意嘅動物係邊種？」李校長答唔出，於是大家一齊開估，答案分別係：撞板、乞（黑）人憎，以及斑馬！
李國章做咗教統局局長，麻煩上身，前幾日出席聆訊，雄辯滔滔，啲記者追唔切。一張報紙報道話，李局長叫教育學院院長莫禮時「穿上襪子，離開教院，出外看看」，左丁山睇到一頭霧水。點解李局長會叫莫禮時穿襪？睇番英文，原來李校長叫莫禮時pullupthesocks。呢句話唔係着襪咁解，而係話你哋做得唔夠好，以後唔該做好啲。只要查吓諺語（idioms）詞典，就知道pullsocksup嘅真正意思，例句如HeisgoingtopullhissocksupifhewantstogetintoHarvard。記者聽李局長講英文，帶定本字典有着數！