搭的士經常見到司機位有4、5部手機，兩邊耳仔掛滿藍芽耳機，講到搵食手機邊部最正，真係隨時連手機Sales都冇佢哋咁熟！不過發現唯一共通點，就係佢哋都係專玩Nokia手機：「最襟、最硬淨，冇其他手機能及！」佢哋玩Press'nTalk亦玩到連無線對講機都飛埋，據知佢哋有張「無限Talk卡」，真係有錢都買唔到！
記者：馬靜兒
攝影：陳盛臣
點解要4、5部手機？
日更的士大佬肥仔話，一般行家都會用上4、5部手機：「每部手機只可儲存1,000個客人電話，一部手機一定唔夠用！我用4部手機，3部入較少光顧客人電話，可用低用量電話Plan；1部入熟客電話，因為熟客經常幫襯，所以要用高用量的Plan！即使放假，我都會將電話號碼飛畀頂更司機，等熟客一樣可以Call到的士；一個月計埋飛線兼台費，隨時都要$700多！」咁點解唔用PDAPhone？肥仔話嫌太大部，寧願用細部嘅手機。
Press'nTalk絕版無限Plan
𠵱家好多的士司機都會用手機Press'nTalk當無線對講機用；主要原因係無線電會受地域限制而收唔清，Press'nTalk行手機網絡，公路上差唔多全無死位！「Press'nTalk一次最多可以40人一齊傾，有行家試過由大陸嗌落香港，聲音都收得好清；但全港只有新世界有這服務……我哋係兩年半前第一批『測試卡用戶』，時至今日都係月費$168/無限用；但𠵱家已經冇咗呢個Plan，新出卡嘅就要逐秒計，玩貴好多！我哋通常40人用一個Channel，一個人講嘢，其他39人都要扣時間。即使$298/4,000分鐘都好易用爆；所以好多人會問我賣唔賣張電話卡，炒價要$800-$1,000。但我一定唔賣，賣咗交的新月費會好厲害，得不償失。」
的士大佬叻過Sales
因為40人用，必須給予商業登記等資料給電訊公司，所以服務一Down機，就要再做Setting。有時電訊公司的Sales都唔夠肥仔班的士司機熟，要打電話問番肥仔點做Setting。
講起這個Press'nTalk服務，隔鄰食飯的司機就好多怨言：「有時會突然Down機，成個台都用唔到對講機，問電訊公司咩事，佢淨係話Down機，搞到我哋好麻煩。都唔知係咪唔多人用呢個服務，想停咗佢！」
私伙機大搜查
訪問時發現，大多的士大佬都會插住幾部6070喺車，不過佢哋私底下又最喜歡乜嘢手機呢？
極秘！的士手機維修店
一般人整手機，多數搵台同去先達；原來的士大佬整機買二手機，會去深水埗一間專門店！嗰度最強係汽車配件，甚麼抄卡器、電話架，樣樣為揸車大佬而設；不過最強係二手機，據知的士大佬們最鍾情Nokia舊機6070：「襟用、硬淨固然好，最緊要佢係最平玩齊藍芽同Press'nTalk功能，二手價$500（出面一般手機舖好少有此機），而且仲成日斷貨㗎！」
的士司機熱賣Items
