𠵱家喺香港，就算要日日賭波都唔係咁困難嘅事，但要長線贏錢必須認真研究重心場次，注碼運用得宜緊要過命中率；今日機會嚟嘞，重心推介阿積士W兼「讓球主客和」嘅「主勝」。
賭波有時係一種心癮，但一天用平均注碼下注10場8場，咁樣淨係輸水位都唔抵啦，所以個人注碼頗為側重，小注則刀仔鋸大樹博中3、4場過關；好似上周中一早喺周一中晒兩場瑞超波過關射AC米蘭上盤，所以去到歐聯決賽日已不用下注買單頭AC，季尾波有時心水或者選擇唔多，跨日過關係無可避免，做人有時要沉着忍耐，所以我今次推介亦唔例外。
主場食硬阿爾克馬爾
先講荷甲歐聯參賽席位附加賽決賽，喺首回合阿爾克馬爾（AZ）主場對阿積士時，俾戰友吾中笑我避而不揀，其實係因為自己睇唔通局勢（因為奇怪阿爾克馬爾W熱透，唔敢博眾人嘅下盤阿積士）；但到咗今日次回合，形勢就明朗好多，喺首回合落後一球嘅阿積士，今次有主場之利，又有兩大中場主力戴維斯同埋加比停賽期滿復出，無論有傷嘅後衞史譚趕唔趕得切復出，相信贏面都好大。
隔夜串埋打比郡下盤
唔好忘記，季尾銳氣已洩嘅阿爾克馬爾，呢場仲有上場首開紀錄嘅中場施奧馬停賽，而且佢哋近屆訪阿積士又表現一般，只得1和5負，今場冇上場咁好彩，喺最後1分鐘入波贏埋咯。勇者更何懼博埋有3倍以上嘅「讓球主客和」嘅「主勝」。
過關玩跨日，唔使睇聽日報紙，先話畀大家知，我最有信心當然係主打英冠升班附加賽決戰，捧打比郡下盤。打比郡前一場作客反勝修咸頓令我印象深刻，跟住次回合互射12碼贏埋，實力運氣兼備，西布朗讓唔起；至於日職愛隊紅鑽喺今日早場，穩贏水手，單W都有肉食喎。
重心出擊
主客和
阿積士W
蘋果波神
狂迷英國波，尊崇雲格；成與敗，視乎你是否找到真快樂！