最近有唔少韓星都鍾意用互聯網嚟公開戀情，韓流巨星元祖金喜善日前就透過個人網站cyworld，公開同圈外男友拍拖4個月嘅戀情。阿Net上過金喜善嗰網站睇過，唔單止佈滿心心符號，而且四圍都見到「我愛你」、「可以愛你嗎」字句，真係sweet都震。
或三年後結婚
由於金喜善經常更新網頁內容，所以每日都有好多網友睇佢嗰網。當網友知道金喜善蜜運後，即刻一傳十、十傳百，傳吓傳吓甚至話佢哋就嚟拉埋天窗。金喜善嘅經理人公司噚日公開回應話，拍拖係事實，但結婚就仲未有耐，相信金喜善會再工作多兩三年至打算結婚。
據講金喜善年初參加朋友聚會，經朋友介紹認識男友，呢位年輕才俊比30歲金喜善大三年，高大威猛兼待人親切，而且佢曾經喺海外留學，𠵱家經營緊間中小型企業。金喜善同個咁好條件嘅富商拍拖，阿Net都戥佢開心。
另外，金喜善前日應服裝品牌邀請，同男歌手安七炫去咗上海出席花生騷睇表演。金喜善冇就戀情接受記者訪問，不過記者就拍到安七炫睇騷時突然擺出蘭花手，真係唔知原來佢咁姣喎。
金喜善個人網頁： http://ww.cyworld.com/kimheeseon
版主：阿Net
本欄逢周一至六刊出
