李蘢怡（Tiffany）曾經因愛情而荒廢事業，後來佢慘受情傷，於是誓神劈願話自己「波大冇腦」，以後唔再拍拖要全身投入工作，點知女仔始終戀愛情大過天，早排Tiffany仲同杜德偉傳緋聞，不過佢哋都否認。
前晚10點幾，李蘢怡被發現同一個男仔夜蒲，佢兩個喺蘭桂坊條斜路行落嚟，一見記者就彈開，仲好緊張猛叫人唔好影相，一路左閃右避，一路行落戲院里，然後就向左走向右走，Tiffany行去置地廣場方向，佢男伴就行入戲院里，其間兩個人仲一路通電話。
自稱赴美學藝
Tiffany早排話要去美國學藝，前晚佢自稱啱啱喺美國返嚟。佢男伴見記者追住影相，好躁咁講咗句粗口：「唔好Ｘ影呀！」希望佢對Tiffany唔會咁躁啦。
隔咗20分鐘左右，吳耀漢同吳嘉龍父子都喺蘭桂坊出現，佢兩個入咗幢大廈，被問到係咪提早慶祝父親節，吳耀漢話：「我哋去按摩啫，香港行美國制，我哋過咗英國制嘅父親節喇，個仔送咗部43吋電視畀我呀。」
