阿Net有時都好佩服啲網友，事關佢哋嘅創意同魄力，分分鐘勁過好多打工仔，韓國就有blog友將40套韓劇嘅男女主角接吻場面剪輯放埋一齊，其後仲被內地網站《韓劇社區》轉載，嗰位韓國blog友本來只係想留下個人美好回憶，結果成為內地網友競猜kiss鏡頭係出自邊套韓劇嘅遊戲。
勾起Fans回憶
阿Net睇過呢個名為「四十部韓劇的甜蜜瞬間」嘅網上討論，都只係認得出七、八成kiss鏡頭係出自邊套韓劇，當中包括《浪漫滿屋》、《這該死的愛情》、《AllIn真愛賭注》、《冬日戀曲》同《悲傷戀歌》等，不過真係勾起好多回憶，畢竟大部份都係經典韓劇場面嘛，唔知各位讀者又認得幾多套呢？
有精明網友認得出照片中有《射星》趙寅成同全度妍嘅接吻場面，真係諗唔到當年點解會安排呢對年紀相差超過10年嘅拍檔演姊弟戀；同樣係姊弟戀，《我係金三珣》入面嘅玄彬同金宣兒就冇咁礙眼，仲令人覺得好浪漫溫馨㖭！唔少網友睇完呢輯照片之後都有意見，網友珍珠平心而論話：「韓劇中的接吻戲越來越普遍了。」阿Net對此百分百贊同，畢竟接吻戲幾乎每齣韓劇都有，只係幾時出現嘅問題啫。
40韓劇Kiss場面
原裝blog： http://blog.naver.com/ujooin6
討論區： http://www.kdocn.com/bbs/thread-228241-1-3.html
版主：阿Net
本欄逢周一至六刊出