法甲冠軍里昂主場對包尾大幡南特，贏輸無改兩隊現有排名，真正「例行公事」；里昂季尾有過一輪頹勢，嚇窒咗唔少季初長捧長收錢嘅球迷，呢場亦唔應該睇得咁高，話晒南特來季要降班已經夠慘，幾大都攞番過尾彩，唔覺意作客贏咗里昂，降班都降得威啲，冷敲南特贏1:0。
「主場王」馬賽穩W
咁啱得咁蹺，聯賽榜次席馬賽，迎戰對手係排尾2嘅色當，同樣地，贏輸都改變唔到兩軍現時排名，但呢場就值得睇高馬賽少少，話晒佢哋都係目前法甲嘅「主場王」，18戰贏13場，勝率逾7成，仲係主場入波最多球隊。色當呢輪輸到暈，今場睇怕想學南特偷雞，機會不大，博馬賽贏2:0。
暫排第5位、仲有望爭直接踢歐洲賽資格嘅雷恩，作客鬥冇乜目標可言嘅里爾，被睇成客隊戰意較強，開出個客隊贏波賠率較熱、亞洲盤仲要少讓嘅盤口。戰意係重要，但有戰意唔代表就一定贏，里爾如果擺明輸，點對得住入場球迷？
呢啲波，見有戰意嗰隊少讓平/半，諗住捧上盤最多輸半個啫！結果好多時咪就係輸半個盤囉！ 文：華度
波膽過關3串7
星期六13 里爾和1:1 7.5倍
星期六15 南特勝1:0 16倍
星期六16 馬賽勝2:0 7.5倍
全中賠率 1,227.3倍