中國星老闆娘向太陳嵐以前出名對張栢芝當女咁錫，不時畀佢預支片酬外，喺栢芝最低落時開戲捧佢，但兩個最終都係反面收場，因為栢芝秘密同謝霆鋒結婚，乜工作都唔接，搞到向太好嬲，早排仲同佢解約，不過栢芝先發制人，入稟法庭向中國星追討1588萬、共16份合約嘅報酬。
「都想好嚟好去」
噚日馮仁昭聯絡咗向太，佢好感慨咁話：「我到𠵱家都未收到佢寄嚟嘅律師信，只係報館將文件fax咗畀我睇，我都唔知邊個鬼頭軍師教佢咁做，如果真係打官司，佢個人嚟講要承受嘅責任都好大。」
至於係咪爭栢芝咁多錢，向太就語帶激動咁話：「如果間公司單係收入唔使支出，又或者爭人錢唔使還嘅，咪個個發達唔使做？咁嘅生意我都想做。其實我都唔想大肚婆唔開心，當日係傳媒不停追問我有冇見佢，我先至將我哋關係終結嘅事實講出嚟，我都唔想演變成咁，大家又唔係有仇，係咪要透過傳媒或者律師傳話先？」
向太又話：「我喺呢行咁多年，明白乜嘢叫好嚟好去，係咪要我同佢一分一毫都計清楚呀？使唔使搞到咁嘅地步呀？以前栢芝有乜嘢事，我都幫佢出頭，因為唔想佢俾人蝦，我為佢做咗咁多嘢，𠵱家真係覺得係自打嘴巴。」
