今屆回歸盃由中港演藝明星隊打頭陣，跟住由歐洲勁旅拜仁慕尼黑決戰南美代表聖保羅；之後由國際足協明星隊同中國國家隊壓軸戰，戲碼以量取勝。
回歸盃唔見咗？
由於今屆有「香港股神」李兆基嘅私人基金贊助4,000萬港元，所以門票超平，收到風成人飛每張$60，學生同長者票$20，平過睇《加勒比海盜：魔盜王終極之戰》（《魔盜王3》），超抵睇，怕且大球場呢次唔爆棚都幾難。
講開回歸盃，最近又聽到一段有關呢個盃賽嘅笑話。事緣足總會長霍震霆公佈外隊消息時，同記者爆響口話唔知回歸盃去咗邊，佢仲叫助手陳中返南沙搵，睇吓見唔見呢個10年前由老霍喺大英博物館，用咗6位數字金額買番嚟嘅青銅獎盃。
唔好話我求大俠唔做功課，翻查資料，回歸盃除咗10年前喺大球場俾馬圖斯捧過後，原來02年亦有同觀眾見過面。當年南非、土耳其同蘇格蘭3支國家隊，同港聯喺香港踢另一次回歸盃，獎盃最後頒咗畀冠軍南非嘅隊長拉廸比。唔知小霍使唔使去開普敦搵呢？