自從00年開始，連電單車都可以考自動波牌之後，揸綿羊仔嘅女士人數直線上升，家陣好多關於電單車嘅駕駛學院廣告，都會搵女仔嚟做代言人，可想而知有幾咁受歡迎。喺綿羊仔當中，又以HondaForza同YamahaMajesty最受歡迎，亦係最多女仔選擇嘅車種，而且絕大部份女車主都不甘平凡，總係鍾意將部車改到靚靚，將它變成「人造羊」。至於呢兩款車最多人改嘅係邊度？以下呢6位「綿羊小姐」可以話你知。
記者：周達之
攝影：陳陶鈞
嗚謝：www.bike.com.hk
加燈變HotItem
現時最得女仔歡心嘅綿羊仔，就係HondaForza同YamahaMajesty，因為呢兩款車夠大路、零件多、保養費又唔貴，不過最重要都係容易操控；而今次小記搵嚟嘅呢6個女仔，本身並唔係車癡，只係喜愛揸綿羊仔嗰種好Free嘅感覺，所以佢哋所改裝嘅地方，都能夠代表一般女仔嘅喜好，亦可以作為綿羊初階改裝嘅參考。
尾箱加燈攞嘢方便
劉姑姑之前揸過VespaET8，即係類似《羅馬假期》柯德莉夏萍坐嗰款，潮爆！家陣就改揸ForzaMF06，而且日日返工都用佢，佢為咗部車可以型啲，特別幫佢換咗對天使眼頭燈，另外仲要喺尾箱加埋燈，話方便攞嘢咁話。
紅黑Seat位型爆
檸檬係咁多個女仔之中最Cool嘅一個，成個女版拓海咁，而佢之所以鍾意揸綿羊仔，最主要係因為方便，好過等巴士。不過，佢有樣嘢同我同事Dennis好相似，就係好憎嗰啲Cut線唔打燈嘅的士司機，但唔代表佢會鍾意打燈嘅的士司機喎，莫非喺香港揸車嘅人都係咁嘅？佢部綿羊最主要嘅改動，就係換咗超白光燈同訂做咗個紅黑色嘅Seat位。
揸綿羊好玩
假如Rosanna日日都以呢一身背心Look嚟揸綿羊仔，相信會引起唔少交通意外，運輸署應該要立例監管一下。講番轉頭，Rosanna之前揸開四個轆，後來揸到悶，所以轉揸綿羊兼入埋綿羊仔車會，擴闊吓生活圈子咁話。至於佢部車最特別係咩？咪係換咗菊花碟同Seat位燈囉！
Seat位邊一排藍光燈，連車底都有，望落個Feel好似落咗Disco咁。（$200）
為Free咩都忍
揸Majesty嘅JoJo，居然喺部綿羊仔度裝咗套JBL喇叭，駁住MP3嚟聽歌，感覺夠晒Free咁話喎！佢亦換咗個短啲嘅迷彩擋風玻璃，貪佢迷迷幻幻。
另外，JoJo話初初學揸綿羊仔時都好驚，尤其有大車喺側邊嗰陣，會有一種壓迫感，不過為咗Free，驚都要忍。
小改可怡情
有幾分似容祖兒嘅ManMan，平日返工會揸綿羊仔，放工亦都係，嬌滴滴嘅佢，部車亦係「嬌滴滴」咁改，只係換咗錶板圓邊燈同加咗塊碳纖裝飾喺車身側邊。咦，又真係改得唔多喎！
我鍾意炸機
咪睇Dobie外表斯斯文文，查實佢好鍾意聽歌炸機，細細隻綿羊居然裝齊高中低音三路喇叭，而且絕對靚聲，絕對唔係高音低、中音高、低音中嗰隻。另外，佢亦換埋天使頭燈同避震，係咁多個之中改得最勁嘅一個。
解開人造羊之謎
貪靚係人嘅天性，即使幾咁鍾意自己部綿羊仔都好，總係仲有啲地方唔滿意，綜合各綿羊車主嘅意見，發覺原來佢哋最想幫部綿羊整容嘅部位係以下幾部份……
錶板：錶板夠光會睇得清楚啲，而且加個圓邊燈價錢唔貴，差唔多係必改嘅部位。
必改指數：5
頭燈：通常嫌佢唔夠光，又或者鍾意加對天使眼等佢望落更有神。
必改指數：3
尾喉：換過套尾喉，排氣暢順啲慳油啲，玩綿羊玩得耐嘅人都鍾意換。
必改指數：2
座位及尾箱：通常會喺尾箱加排燈方便照明，亦有人鍾意成個Seat位換咗佢，坐得舒服啲。
必改指數：4
加喇叭：好多人都會幫部車加套喇叭駁MP3，邊走邊聽歌。
必改指數：3
男人點睇女人揸綿羊
攞到牌即係有能力啦！
「我覺得係件好事，其實台灣同澳門都有好多女仔揸綿羊，點解香港唔可以？好多人認為女仔細力，好難操控咁大部車，但我認為運輸署既然發得個牌畀考牌嘅女仔，就即係證明佢哋有足夠能力應付，唔需要作無謂嘅擔心。」
揸得多技術一定好！
無論係男仔定女仔，揸得多就會熟能生巧，唔會話男仔好過女仔，況且我覺得綿羊仔喺外形上仲好啱女仔揸㖭，而家陣嘅綿羊仔設計得好容易操控，駕駛者可以好專心咁享受駕駛嘅樂趣。
揸綿羊仔記得要「上會」
你咪叻唔切，以為我講嘅「上會」係叫大家供車喎！其實意思係叫大家不妨加入綿羊仔嘅車會啫。就以今次接受小記訪問嘅「綿羊小姐」咁，佢哋都係來自ForzaHKClub同MajestyUnited呢兩個綿羊會。以呢兩個車會為例，佢哋都係非牟利性質，毋須會費，而會裏面嘅一班幹事會定期組織活動，以綿羊仔遊盡香港景點，最多一次仲有成100部綿羊仔參加，浩浩蕩蕩十足遊行咁，仲可以識埋一班志同道合嘅朋友，的確幾好玩㗎！
網址： http://www.bike.com.hk
後記
揸綿羊仔的確要有番咁上下堅持，皮包鐵不在話下，冬天寒風刺骨、夏天戴住頭盔熱到頭頂出煙，打風落雨仲會搞到自己變咗落湯雞，可以話係咩麻煩事都會出現。拍攝當日遇上黃色暴雨警告，個個淋到落湯雞咁都依然毫無怨言，兼且樂在其中，佢哋仲話唔會變心轉揸私家車。小記聽見都不得不佩服佢哋嗰份熱誠，換轉係我？真係寧願迫巴士都唔會揸綿羊！
