呢期車壇最Hit嘅Topic係乜？咪繼續係我哋講咗好耐嘅環保車囉！自從政府公佈對嗰啲環保汽油私家車，提供減免30%首次登記稅嘅優惠之後，搞到呢類車突然變成搶手貨。
最近我悠穎馳又收到風，話Lexus代理繼佢哋嗰部RX400h環保SUV之後，喺下個月又會引入埋至Top嘅混能豪華房車LS600hL嚟香港；雖然部車個Look同以傳統汽油做燃料嘅LS460L差無幾，但動力核心卻變成5.0V8引擎，跟交流電馬達所組成嘅LexusHybridDrive系統，單係馬力已經可以去到445匹，足以媲美6.0公升級別車款。耗油量方面，若以廠方公佈嘅10.75km/L跟現時$13.48/L嘅油價計算，即平均每公里約$1.25，同一部3,000c.c.嘅房車相差無幾。預售價為150至160萬元，至於可唔可以獲得最高5萬元嘅首次登記稅稅務寬減優惠，就仲有待政府公佈。代理家陣已經開始接受訂購，想做環保富豪嘅朋友，就要落去Showroom睇睇啦！
查詢：皇冠汽車（25119430）
悠穎馳
豪邁不羈，愛車如命，聽幾下引擎聲就知咩車！