電視劇《學警出更》將會緊接《溏心風暴》播出，噚日成班演員去咗培正中學做宣傳，但係劇中主角，包括英皇一姐容祖兒、之前傳緋聞嘅陶大宇同郭羨妮，仲有徐子珊就唔見人，得番吳卓羲同陳鍵鋒兩個，同埋楊怡、吳日言等支撐吓場面。監製黃偉聲就話：「大宇下個月9號先返香港，郭羨妮就請假到7月，祖兒得閒都應該會做宣傳，其實套劇都唔一定要主角做宣傳，我哋都係標榜後生仔。」
被搣patpat
監製話標榜後生仔，但係連吳卓羲都話過幾日會返內地拍劇，得番陳鍵鋒一個孭飛，問佢驚唔驚緊接《溏心風暴》後播出有好大壓力？陳鍵鋒話：「今次我哋有好多大場面，又有祖兒成班外援，可觀性都幾大㗎。」佢又話上個禮拜去完泰國度假，竟然畀人輕薄，佢話：「我同成班朋友去飲嘢，點知連續畀3個女仔搣patpat，嚇到我都唔識反應。」
