亞洲出版業協會年度卓越大獎噚晚舉行頒獎禮，八方多個同事有份攞獎，香港、台灣《蘋果》嘅編輯、攝影記者同記者，總共贏到六個版面設計、攝影同報道獎項，成日喺《蘋果》發表政治漫畫嘅尊子都有攞獎，八方向咁多位得獎同事同其他得獎同業講聲恭喜。
《蘋果》參賽作品喺逾500個入圍作品中突圍而出，真係好犀利，評判讚奪得「卓越報版設計獎」嘅台灣《蘋果》，頭條用字、相片同配圖嘅結合好搶眼同達到吸引讀者嘅效果，版面設計強化新聞重點，雖然有啲報道略為煽情，但無可置疑能夠清晰咁向讀者解釋成件新聞。
獲頒本地記者獎（中文）嘅《蘋果》記者陳沛敏，舊年足迹遍及東南亞，憑日本新首相安倍晉三上任同緬甸民主化報道奪獎，評判讚佢能夠喺歷史角度探討爭議性問題。陳沛敏得獎後，話多謝上司畀機會同栽培佢。
大會請咗內地《冰點》前主編李大同喺頒獎禮上演講，李大同話北京政府對傳媒控制幾十年嚟一直冇放鬆過，視傳媒係宣傳工具，傳媒跟隨指揮，變相成為施政失敗嘅幫兇，不過佢話新一代傳媒人受西方新聞自由思想感染，𠵱家報道時會考慮公眾利益，所以近年多咗發掘真相嘅報道，相信已播下新聞自由種子，不過佢承認，收成之路仲好漫長同迂迴。
