畢傑近排去完巴西，好自然要玩吓巴甲，今期向後日法林明高迎戰保地花高呢場里約熱內盧打吡戰埋手，我就肯定揀有連拿度奧古士圖壓陣嘅法林明高贏波㗎喇。唔信？佢哋職員喺我臨走前，仲請我食保地花「糕」𠻹！畢傑
法林明高開「咧」戰喺主場馬拉簡拿球場輸2:4畀彭美拉斯，畢傑呢場波都有喺現場做直擊，發現法林明高10號仔連拿度奧古士圖嘅踢法好有李華度影子，扭波、遠射、短傳乜都掂。我仲見到連拿度奧古士圖俾幾個大隻佬、好大力係咁撞係咁「擔位」，但佢郁都唔郁下，仲連波都攞埋，平衡力好到不得了，佢真係靠一人之力就可以影響賽果。
教練畀料呢場贏硬
上場作客贏戈亞斯3:1，終於攞番贏波信心，繼連拿度奧古士圖開「咧」戰入波後，上場左翼衞祖安都有份建功；呢位前阿仙奴球員速度高、助攻力極強，佢嘅回勇應該好有幫助。𠵱家幾位主力相繼開齋，相信今次應該輪到新加盟兼上季巴甲神射手（17球）洛廸高蘇沙，射破保地花高大門嘞啩！
畢傑都有去過法林明高嘅訓練場，嗰日見佢哋輸完畀彭美拉斯後，球員操練鬼死咁認真；教練尼維法蘭高仲同我講，揭幕戰喺馬拉簡拿輸咗波，呢次肯定唔會再輸多場，淨係計呢股精神同戰意，就值得捧法林明高W啦。
保地花高搏到攰晒
嗰邊保地花高都唔係弱雞，有喺阿聯酋回流嘅名將杜杜加盟，呢位射手喺季前球迷嘅「我心目中最佳球員」選舉中，竟力壓羅馬里奧成為榜首，就知杜杜來頭唔嘢少。可惜，保地花高喺周中嘅巴西盃4強次回合盡遣強陣，體力肯定輸晒畀法林明高，個海外莊家有2.6倍嘅主W相當穩。
球迷都可以買「大」嘅；因為呢場話晒係里約熱內盧打吡，加上喺馬拉簡拿球場度踢，兩邊肯定搏盡。至於法林明高門將賓奴雖然高大有型，但把關技術一般，開「咧」戰就係俾彭美拉斯嘅艾蒙度，一記3樓咁高嘅「傳中罰球」笠死，要埋「大」啱㗎嘞。
冷選23線股
星期日31
波膽
法林明高勝4:2
評語：周日心水場次唔多，無謂過份扒冷，補注法林明高贏4:2仲好分。
熱選大藍籌
星期日31
主客和
法林明高勝
評語：保地花高聯賽開季兩連勝，佢嘅賠率較熱屬正常，唔使驚，一於捧法林明高。