仲有個幾月先放暑假，上親子王國討論區望吓，港九新界暑期活動報料站已經有超過30萬人次瀏覽。學《師奶兵團》幾位師奶話齋，幫小朋友報暑期班，要好玩、有嘢學、又要合乎Budget，唔係去街市買棵菜咁簡單。經過歷時一個晚餐嘅漫長討論，6位師奶各自幫自己仔女揀好班，睇吓有冇你同仔女嘅心水？
記者：劉嘉蕙
攝影：楊錦文、劉嘉蕙（部份相片由受訪者提供）
過來人分享時間表編排心得
做得家長，個個都想仔女嘅暑期過得充實，記者訪問多位家長，每人閒閒哋幫仔女報3、4個暑期班，學費支出都係其次，最怕時間表密麻麻，搞到小朋友日日趕場，吸收唔到就嘥錢嘥心機。
梅太：要有休息時間
醒目媽咪梅太好識為囡囡Charlotte打算，舊年幫Charlotte報咗8個暑期班，因為時間表編排得宜，囡囡學到嘢又玩得開心，仲話今年唔去旅行，淨係上暑期班就夠！
梅太醒讀者以下編排時間表貼士：
1.語文課程最多一日一樣，唔好又中又英又法又日搞亂晒。
2.報暑期班要留意地點，盡量就番相近地區上堂，方便接送又唔怕小朋友舟車勞頓。
3.堂與堂中間要安排1至2小時小休息，俾小朋友食吓茶點走動吓。
4.體力消耗大嘅活動，如游水、球類活動等最好揀喺黃昏時段上，避開中午陽光太猛烈。
楊太及仔仔Alan
「暑假會俾仔仔上循道衞理課程，6個星期安排好晒，又有得踢波，男仔最鍾意。我要返工冇時間搞咁多，一啲長期暑期計劃幫家長Plan好晒唔使煩。」
陸生及囡囡Cathy
「囡囡會參加學校童軍暑期活動，另外再睇吓有乜嘢班適合，我幾想俾佢學餐桌禮儀班，以前又有上過EQ班。」
方生方太及囡囡Vanessa
「囡囡今年升小一，可能上啲學術性重嘅班如公文數，往年上過煮食班、打鼓班，暑假玩得開心最緊要。」
何太
「暑假最緊要囡囡玩得開心，好似個跳舞唐詩班幾得意，往年會俾囡囡先上一堂試堂，佢鍾意先會繼續上。
專家教路點揀暑期班
1.最緊要和子女有商有量，建議20-30%家長意願，子女意願佔70-80%，多啲尊重子女意見。
2.日程過忙會妨礙吸收，大忌係「返暑期班仲忙過返學」，變咗揠苗助長。
3.每星期最少1至2日俾仔女「放假」，等佢哋獨處同消化一周所學。
4.如果報唔到心儀嘅暑期班，都仲有好多嘢可以做，姚主任建議父母俾小朋友睇書或者帶佢哋遊交通工具河，經濟得嚟又可以傾吓偈，促進親子關係。
肥娥：「畀1次學費學跳舞背唐詩，筍！」
活潑唐詩跳跳豆
活潑唐詩跳跳豆導師Elsie本身係前香港舞蹈團首席舞蹈員，亦係上海人，有次喺屋企教3歲半囡囡芊芊用普通話背唐詩，再編排相關動作，發現芊芊話咁快學識，單單做幾個動作就可以背番成首詩出嚟，觸發Elsie開班教跳舞唐詩靈感，「幼兒階段係啓蒙語言發展最佳時期，以舞蹈配合唐詩，可以提升韻律感。」採訪當日芊芊帶埋同學悅悅一齊學，完全冇經驗嘅悅悅一學就曉，跟埋Elsie母女腳FingFing好開心。
UStudio
適合年齡：4-7歲
學費：$1,100/10堂$140/堂
上課地區：旺角
查詢：98134338周小姐
希拉莉：「學識DaVinci，夠晒Classy。」
學達文東密碼 懂多面知識
達文東密碼句宣傳口號不得了，叫做「東方孩子與西方大師的藝術對話」，其實係一個圍繞達文西同西方文藝復興時期做主題嘅藝術課程。創作室根據學員年齡度身訂做不同題目，例如2歲半可以上「文藝復B」課程整吓泥膠人；大個啲就學建築、解構「人體奧妙剪」，甚至整飛船、潛艇、風力發電儀咁，記者睇過學生製成品，真係成個昂坪360吊車都整到出嚟，達文西翻生可能都會嚇親！
CreativeKids奇極創作室
適合年齡：2歲半-17歲
學費：$740-$1,950/4堂
上課地區：中環，太古城
查詢：25304336
網址： http://www.creativekids.com.hk
麥太：「學芭蕾舞可以矯正寒背。」
體健芭蕾舞
好似麥太咁關心小朋友康體發展嘅家長，可以考慮結合物理治療同芭蕾舞嘅體健芭蕾課程。呢個課程幫助小朋友糾正不良姿勢，寒背、斜膊、八字腳等問題，透過練習芭蕾舞逐步改善。小朋友平日返學孭書包、坐電腦嘅不良姿勢，趁住暑假一次過矯正番！
藝苗舞蹈學院
適合年齡：4-11歲
學費：$380/4堂
上課地區：荃灣
查詢：35951211
網址： http://www.ballerina.com.hk
阿濛：「一個班搞掂一對仔女，仲有折頭，快靚正！」
暑期密集戲劇班
《師奶兵團》入面嘅阿濛生咗對龍鳳胎，凡事打孖上真頭痛，佢發現啓智有戲劇班，即刻幫一對仔女報名，貪佢喺屋企有得演對手戲，齊齊演出又可以好似Twins咁壯吓膽。呢個劇製作認真，畢業作會去西灣河文娛中心演出，爸爸媽媽可以分享學習成果，兩個或以上兄弟姊妹檔上堂仲有95折，抵！
啓智
適合年齡：6-12歲
學費：全期$3,600（包括4次3小時課程、1次總綵排及演出）
上課地區：灣仔
查詢：25201716
網址： http://www.eduarts.com.hk/
花師奶：「以後唱《別怪他》有人伴奏喇！」
玩手鈴學溝通
花師奶成日一支公唱《別怪他》，屋企冇人同佢合唱好寂寞，所以呢個暑期佢捉咗花帶柑同花帶桔去上手鈴班，等佢哋學完返嚟幫佢伴奏。比起學其他樂器，手鈴勝在體積細，唔阻屋企地方，且講求高度合作性，𠵱家香港家庭咁多獨生仔女，帶佢哋學手鈴正好可以學習同人多啲溝通相處。
香港手鈴藝術學院
適合年齡：3-18歲
學費：手鈴體驗班$600/4堂
各級別初級手鈴班$1,900起/12堂
幼兒七彩手鈴班$1,500/12堂
上課地區：北角（幼兒班另於大埔、屯門及粉嶺設課室）
查詢：31042355
網址： http://www.hkhandbell.com/
小丸子媽媽小林瑾：「咁得意，我都想玩埋一份。」
角色扮演暑期班
屋企有個好似小丸子呢啲問題天天都多嘅小朋友，一個平凡嘅暑期班真係搞唔掂。有教育中心搞「小小職業」系列，由記者、設計師、偵探都有得扮。最有Gimmick可以話係小小食家班，中心已經Confirm喺SOHO區幾間食肆教煮又教食，包括做炸魚薯條出名嘅TheChippyPlace及食Pizza嘅Pepperoni。另外仲傾緊幾間西班牙、墨西哥同法國餐廳。家長梅太話囡囡已經講到明一定要參加小小食家班，上完可以學蔡瀾逛菜欄喎！呢兩年記者班學員去過路透社訪問編輯，又去過郵局搵郵差叔叔傾偈呀！
Jack&JillTreehouse
上課地區：中環、康怡花園
適合年齡：8歲以上
學費：小小偵探班$1,650/5堂
小小食家班及小小記者班$1,500/4堂
查詢：31021328
網址: http://www.jacknjill.com.hk/