第五話
陳豪在《溏心風暴》中飾演戇直的得得地，雖然有人覺得他演技浮誇，但角色仍然成功出位，陳豪更指得得地這角色為他帶來好運，讓他夾在一班前輩演員中仍然搶眼。不過陳豪卻自言不會像得得地對常在心（鍾嘉欣飾）那麼癡情，因為他面對愛情非常理智，不會浪費太多時間去等待一個人。
陳豪在劇集《溏心風暴》中憑得得地唐至安一角，成功令人留下深刻印象，對於這個戇直角色，他自言有一定難度，加上現實中的陳豪是家中孻子，卻要在劇中扮演大佬角色，他說：「其實都幾得意同新鮮，以前未試過呢種角色，對觀眾嚟講都有驚喜，我都好鍾意呢個角色，簡單得嚟又有挑戰性，自己都估唔到得得地可以有咁嘅效果，𠵱家直頭覺得開始好好運。」
自度誇張演繹法
能夠與一眾前輩合作，陳豪表示感到十分榮幸，他說：「好開心可以一齊合作又可以學到好多嘢，其實要喺一班前輩面前突出自己嘅角色好難，佢哋咁爐火純青，好彩自己都算有少少運氣，加上本身個角色都有好多搶眼戲，不過成套劇冇咗一班前輩嘅演出，真係會失色好多。」
雖然陳豪本人十分滿意得得地一角，但也有部份觀眾認為他過份浮誇，陳豪說：「其實係專登做得誇張少少，係同夏雨一齊諗出嚟㗎，想喜劇嘅效果更加好，如果要我重新再演，我𠵱然會用同一種方式演繹，雖然有觀眾覺得誇張，但係小朋友鍾意比較搞笑，所以會接受。」得得地在唐家扮演康樂組組長，經常表現開心一面，但劇集發展至後期也有不少傷感戲，他說：「我本身係一個好開心嘅人，唔開心會收埋自己，唔會俾人知，話晒男兒流血不流淚，我都會有自己唔開心嘅經歷，所以要喺戲中喊，都唔係太大難度。」
自詡對愛情專一
得得地對愛情專一，一心一意為常在心付出及等待，現實中的陳豪自言對愛情十分理智，他說：「我對愛情係一個好簡單嘅人，一個就一個，係唔會同時出現兩個人，總之就從一而終啦。咁樣要去等一個人，我就未試過，人哋有冇等我，我就唔知喇！得得地咁死心塌地，我相信年輕人先會做，我絕對唔會浪費咁多時間去等待，我鍾意一個人會好勇敢去同佢講，唔得嘅話就唔會諗太多，但就一定會嘗試爭取。」
採訪：王崇穎
攝影：仇志德
