人人話好人難做，連到了荷李活發展的發哥周潤發，昨日在東京接受本報專訪時也這樣說。演過了《加勒比海盜：魔盜王終極之戰》（PiratesoftheCaribbean：AtWorld'sEnd）的奸角嘯風船長後，發哥愛上了做壞人，只因好人難做。他又自爆電影公司服務周到，扮爛面海盜的他落裝後例必可以做面膜，反而令他的皮膚更滑溜。
完成了前日的《加勒比海盜：魔盜王終極之戰》記者會和武道館首映禮連環宣傳後，在電影結局中遭船員甩掉，剩下孤獨一人的主角尊尼狄普（JohnnyDepp），前晚卻飛甩所有拍檔，漏夜離開東京，剩下周潤發和奧蘭多布魯（OrlandoBloom）等演員昨日在東京接受亞洲傳媒訪問。
免費敷Mask皮膚靚
在銀幕上做慣大英雄的發哥，今次罕有地飾演亦正亦邪的奸角嘯風船長，他說：「𠵱家我比較喜歡演壞人，因為好人難做，壞人就容易做，好似馬英九咁，做好人幾難！」發哥又自爆扮爛面奸人嘯風非常歎，他說：「雖然化個妝要成兩個半鐘，之後落妝又花個半鐘，但每次電影公司都安排同我做半個鐘面膜，搞到我拍完呢部片之後，啲皮膚靚咗好多。」
談到在片中強吻女主角姬拉麗莉（KeiraKnightley）的場面，發哥說：「嗰場戲都只係以拍戲嘅心情去演，冇特別感覺，不過我事前擦牙同囗口都做齊，仲一take拍好冇NG！」片中英語大有進步的發哥，謙虛卻自傲地說：「我覺得自己英文仍要磨練，不過，拍咗三部國語片後，自然啲普通話好咗。我認為亞洲人可以做到西洋嘅角色，但好似湯告魯斯（TomCruise）同湯漢斯（TomHanks）嘅西洋影星，反而就拍唔到亞洲片。」
發哥早前接受路透社訪問時還說：「其實我寧願接拍多啲劇情片，但似乎荷李活仍未習慣亞洲男演員當電影主角，或者我哋仍要等多幾年。」
奧蘭多俾Fans嚇親
另一邊廂，扮演鄧維廉的靚仔奧蘭多也大讚發哥，他說：「周潤發十分友善！他是偉大的演員，雖然我未去過香港，但周潤發已邀請我去，他說到時一定會招待我。」已到過日本五、六次的奧蘭多覺得日本影迷相當熱情，他說：「估不到首映禮上有fans對着我流淚，令我非常驚訝！」
談到片中出人意表的結局，近年篤信佛教的奧蘭多說：「片中的我只是變成鬼船長的身份，我不覺得鄧維廉是死了，我很喜歡這樣的結尾。」
採訪、攝影：森林檎
哈利仔有嘢噏
發哥去到邊都咁受歡迎，人緣又好，喺荷李活做忠做奸都一樣有得揀，只怕佢唔肯揀甩人底啫！
蘋果娛樂特派評述員哈利仔
