時間：93年6月
活動：港姐選舉
人物：麥家琪
經過：93年只有17歲嘅麥家琪參加香港小姐選舉，本來樣靚身材正嘅佢都好有機會攞獎，當年仲係熱門人選，不過喺賽前就傳出麥家琪曾經拍過露點寫真，結果決賽夜，麥家琪大熱倒灶，連最後五強都唔入，由莫可欣攞咗冠軍，亞軍林麗薇，季軍係余少寶。
不過當晚就有個小插曲，當司儀宣佈最後五強時，電視螢幕明明係打咗麥家琪個名出嚟，不過司儀就宣佈咗余少寶，呢個小錯誤令傳聞四起，有人就聯想到同麥家琪被傳拍艷照有關，事後無綫梗係例牌否認。
選美結束後，真係有批麥家琪嘅性感相俾雜誌登咗出嚟，麥家琪本人就堅決否認係相中人，佢仲話：「呢個時候，我激動都無補於事，睇過照片，自己都覺得同相中人樣貌確有幾分相似，但身形就自問唔及。」麥家琪仲話會採取法律行動，結果佢爹哋就向高院申請禁制令，阻止嗰批相再刊登。
麥家琪雖然失落港姐，不過之後佢仲憑住性感形象打入電影圈，不過舊年同大律師男友王國豪結婚之後，佢就收起性感喇，早排佢仲承認有咗BB，10月會做媽咪㖭，唔知佢到時會唔會同BB影番輯寫真留個紀念呢？
本欄逢周一至周六刊出