足智彩喺過去嗰個禮拜，專誠為歐協盃、英格蘭足總盃及歐冠盃3大盃賽決賽，增設新玩法「即場入球大細」，即係所謂嘅大細走地盤。
可能運作上仲係比較新嫩，足智彩呢個「即場入球大細」嘅入球中位數，都係由一般嘅2.5球，逐球遞增或扣減，寧願以賠率去遷就個球數。
一般大細走地盤，除咗一球一球咁上落，仲會有例如2球/2.5球、2.5球/3球、甚至2球、3球咁嘅盤口，投注人士除咗只有贏及輸兩個結果之外，亦有機會贏半個盤、輸半個盤、甚至走盤保障。而且，「大」「細」兩邊賠率亦唔會去到某個時間就變成一面倒。
好似上周中歐協盃決賽，愛斯賓奴同西維爾喺60分鐘仲係打成1:1時，足智彩「即場入球大細」入球中位數，由3.5球變番做2.5球，但個「大」就得番1.45倍，「細」就有2.55倍，睇住直播想刺激啲，博是但一隊入多球開個「大」，但見到個賠率都唔吸引，點提高大家嘅投注意欲呢？
開咗波仲有得諗
不過，其實𠵱家唔少賽事，賽前「入球大細」兩邊賠率，都已經出現一面倒現象；前晚歐冠盃決賽AC米蘭對利物浦，「大」有2.33倍；下半場AC米蘭仲領先緊1:0時，2.5球個「大」，曾經去到接近2.5倍，嗰陣至出手又收多啲啦。 文：華度