煲呔搞唔掂立法會班大帝，西九被迫落馬，但話晒佢都係個強政勵治嘅politician，拆皇后碼頭呢個細得多嘅project，冇理由再拖落去，親自出馬向保皇黨軟硬兼施，終於可以開工拆皇后，民建聯蔡菜子投棄權票，仲激動「咇」淚光，睇落覺得好淒涼，劉秀成仲一走了之唔投票。八方早料皇后大勢已去，卻估唔到隨時多幾個人為背叛皇后犧牲政治性命。
噚日議員以十票對七票通過拆皇后，就算蔡菜子唔投棄權票改投反對票，政府都夠票有凸郁皇后，根本唔使迫到蔡菜子埋牆角。八方睇清楚噚日投票結果，有個有趣發現，在坐18個議員，原來得蔡菜子一個係香港島直選議員，投支持票嘅10個保皇黨，唔係功能組別議員就係九龍、新界區議員，佢哋啲選民對位於中環嘅皇后碼頭命運有幾關心可想而知，如果蔡菜子跟隊，就變成惟一支持拆皇后嘅香港島議員，第日選舉時都幾難向市民交代，面對咁嘅局面，蔡菜子唔喊出聲，算好忍得嘞。
大嚿腎功能得番一半
建築測量界議員劉秀成噚日想使拖字訣，要求再押後投票，但唔成功，最後一走了之唔投票鬆人。佢出此下策，係因為前無去路，後有追兵，一方面俾煲呔迫得緊，另一方面民主派又吼實佢個位，如果佢表態支持拆皇后，撐皇后嘅建築師、工程師唔噓爆佢至奇，出年選舉唔慌有運行，閃開唔投票，算係冇辦法之中嘅辦法，工聯會嫻姐瀟灑得多，唔投票咪唔投票囉，使畀面煲呔？
聲言會投反對票嘅陳偉業，噚日入醫院做bodycheck，檢查結果都幾嚇人，佢話自己個腎得番一半功能，健康要緊，對唔住皇后都冇辦法，好無奈。大嚿同煲呔一向有偈傾，05年煲呔參選特首，大嚿有份提名，今年就煲呔、梁家傑都唔提名。佢身體不適投唔到票，八方真係覺得好唔抵，最可惜係佢唔早講，話唔定大家會等埋佢先表決呢？