曾經稱得上係荷李活型男嘅馬修麥康納希（MatthewMcConaughey），上年無端端性情大變，戲就唔見佢拍多部，反而終日流連海灘，或者同幾個彪形大漢做健身，只聞樓梯響嘅健身錄影帶，都唔知幾時先有得出。唔見咗一排嘅馬修，最近又再次現身，佢竟然喺加州嘅海灘上面，攞住兩塊蕉葉喺度扮雞叫，搞到阿Net都𢱑晒頭。
嚇壞細路
有網友日前喺加州馬利布嘅海灘見到馬修，即時拍低片段放上網，當日佢披頭散髮赤裸上身，只係着住條黑白間孖煙囱，仲攞住兩塊大蕉葉，一邊走一邊扮雞叫，來來回回海灘幾次，其間佢又玩衝浪同插沙，更不停尖叫，唔通馬修練習緊扮演小公雞嘅角色？不過阿Net喺片段入面，發現馬修身前有位玩緊沙嘅小朋友眼定定望住佢，睇怕都係嚇到儍咗。
大表惋惜
唔少網友睇完片段後大表惋惜，當中網友costamesa話：「都叫佢咪食咁多藥啦！」網友Beauty則話：「呢個男人都幾恐怖！」
不過有唔少人仍然力撐馬修，覺得佢做乜都係咁型仔，網友MT話：「我唔理佢係咪癲，你睇吓佢個身形幾熱辣辣！」阿Net幾時都話，偶像崇拜係盲目㗎！
馬修海灘亂舞片段
網址： http://www.tmz.com/tmz_main_video?titleid=909829193
版主：阿Net
本欄逢周一至六刊出