無綫前高層黃家亮月初自殺身亡，噚日佢嘅家人替佢喺世界殯儀館設靈，今日出殯。除咗黃家亮爸爸、太太同女兒嘅心形花牌外，靈堂都放咗方逸華、陳志雲同樂易玲送嚟嘅花牌，另外郭富城、劉德華、黎明、汪明荃同鄭少秋都有送花哀悼，苗僑偉同戚美珍、吳家樂、向海嵐、廖啓智同陳敏兒等就陸續到場。
爭花牌排位
黃家亮嘅家人安排傳媒入靈堂弔唁，記者入到去見到英皇高層吳雨指揮搬花牌，要將本來放喺靈堂左邊後排、容祖兒送嘅花牌搬去前排當眼處，佢一見記者影相，好尷尬咁話：「將啲藝人花牌搬晒去右邊啦。」於是祖兒嘅花牌就移咗去右邊前排、Twins花牌旁邊，仲遮住隔籬陳慧琳嗰個。
黃家亮生前被封為少年石修，噚日石修帶住兒子陳宇琛前往鞠躬，石修話：「我識咗家亮超過20年，最近先知佢叫少年石修，佢好有才華，我好唔捨得佢，佢喺一班老友心中永遠存在。」無綫監製何小慧幫手辦喪事，佢同成班無綫新舊監製合作將黃家亮生平片段，剪咗段三分鐘短片喺喪禮度播，又做咗本紀念小冊子，裏面有沈殿霞、汪明荃同利孝和夫人等人寫嘅懷念字句，何小慧話：「黃太心情好番好多，佢叫我代佢多謝各方好友關心，家亮並唔寂寞。」
