天時暑熱，大汗叠細汗，小朋友最易玩到成頭濕晒，一於帶佢去髮型屋剪個靚髮爽番吓……只不過小朋友新陳代謝快，連頭髮也生長得特別快，唔夠一個月又要到髮型屋修剪，諗落條數都好襟計！如果自己識得剪就唔同喇，隨時隨地都可以幫小朋友轉換新髮型，慳荷包之餘亦可促進雙方之間的溝通，有助建立親子關係。
記者：趙珮倩
攝影：何家亮
示範：家庭髮型師Ady（98229643）
Model：Harry&KiKi
上門專剪小朋友
本身是酒店花藝設計師以及插花班導師的Ady，喜歡甚麼都要執到靚靚，以前經常會到髮型屋Set頭剪髮，但未知是否要求過高，有時出來的效果卻並非心中所願，她說：「去髮型屋剪髮，成日都要等好耐，剪出嚟嘅效果都唔啱自己要求，於是就決心學剪髮。一來自己可以幫自己剪，二來亦可以同自己個小朋友剪，好處係完全可以照自己意思去剪，唔使假手於人，又慳咗好多時間。後來有親戚朋友見到我幫小朋友個頭剪得咁靚，就提議幫佢哋嘅小朋友剪埋，就係咁，一剪就剪咗五、六年，做埋髮型師。」講多無謂，不如馬上請Ady過兩招畀大家啦！
Kid'sHair男女睇……
女仔長髮要逐少剪
steps
貼士：留長髮宜勤修薄
Ady說：「好多小女孩都鍾意留長頭髮，留得耐，頭髮自然會厚。不過如果長時間紮辮好易令到髮根過重，會出現頭痛，所以最好keep住剪薄，等頭髮重量輕番啲。另外，我見過一啲細路女因為頭髮太長時間分死一條界，令條髮界越來越明顯，好似冇頭髮咁，所以最好過一段時間就轉換髮型，唔好成日梳死一邊。」
男仔髮刨要夠貼
steps
貼士：焗油後更易打理
Ady說：「男仔髮質天生比較粗，加埋成日玩戶外活動，曬得多會令頭髮更硬更嚡，梳極都唔順，剪頭髮時好難控制。其實男仔都需要做焗油，增加髮質柔軟度，梳理剪髮更易於控制。其中剪耳邊鬢腳最考功夫，一不留神好易整傷小朋友耳朵。加上好多小朋友都好驚髮刨發出的噪音，不妨預先在他們的耳朵塞上棉花，幫助減低恐懼感。」
兒童剪髮宜忌
宜 投其所好：
小朋友坐唔定又冇耐性，剪髮時最好投其所好，例如讓他看喜歡的圖書、卡通片，甚至打遊戲機、食糖果，分散他們的注意力，自然可以坐定定，聽聽話話任你剪。
忌 剪馬尾：
千萬不可貪快貪方便，紮住條馬尾一刀剪下去，這樣出來的髮型會一岩一忽。
忌 笠湯碗：
不要以為用湯碗笠住個頭，沿碗邊剪出長了出來的頭髮會方便快捷。其實每個人的頭形都不同，咁搞法效果會缺乏層次，還會被人笑做「湯碗頭」。
剪髮工具好得意
正所謂「工欲善其事，必先利其器」，要幫小朋友剪個靚靚髮型，當然要有適當的工具：
Combi圓頭髮剪、髮梳套裝$238（a）
圓頭髮剪，髮梳不怕刮親小朋友，媽咪可以放心慢慢剪。
圍巾$109（a）
幫小朋友剪完頭髮，一地都係髮碎有排掃！呢條圍巾附有兜型設計，兜住髮碎可以掃少次地。
牙剪梳子二合一$60（b）
初初為仔女剪髮，一手拿梳，一手拿髮剪，難免手忙腳亂。這把將牙剪和梳子二合為的功具，刀片和碎度也可任意調校，真是初哥救星。
靜音兒童剪髮刨連配件$199（c）
特效靜音兒童剪髮器，再唔怕有噪音嚇親細路。設有三段刀片角度，刀鋒特以安全圓頭設計，減低割損情況，更可調校四個剪髮長度髮，方便到極。配件包括剪髮披肩、貯存袋、理髮髮梳、剪刀、清潔掃及潤滑油，一年保養。
㗎仔兒童髮型書$103.7（d）
超過70款男女童髮型參考，教你點吹點gel點紮辮，唔識日文，齋睇圖都掂！
查詢電話：
（a）BeBeDream（21159683）
（b）city'super（25062888）
（c）Conair（27514604）
（d）皇冠書屋（28314877）