前練馬師羅國洲在家發生罕見意外，跣倒在地，後腦撞正地上啞鈴，因此逝世，聞者惜之，可惜，憐惜，痛惜也。羅國洲出道之時，人氣直逼告東尼，在馬圈年青紅牌騎師中，有一時瑜亮之稱。後來告東尼成為騎師冠軍，羅國洲成績倒退，改為副練馬師，反而因禍得福，適逢其會，二十八歲（一九八六年）就成為練馬師，鋒頭一時無兩。
以前有馬支持羅國洲馬房嘅珠寶L嘆息話：「少年得志有時都唔一定係好事，Eddie未夠三十歲就要風得風，要雨得雨，好快就慣於享樂，練馬成績如逆水行舟，二○○四年就冇咗牌。今天更離世而去，我識佢於微時，我父親畀馬佢騎，我畀馬佢養，睇住佢紮起，睇住佢失意馬圈，𠵱家都幾傷感。」左丁山就冇識羅國洲咁耐，第一次見佢，係抽到新馬之後，鄭大班當時同羅國洲好熟，安排大家一齊喺福臨門食飯，不過左丁山隻馬最後冇去佢馬房。
先衰後盛者，有愛倫徒弟沈集成，佢亦係紅牌騎師出身，騎技就冇告東尼、羅國洲、劉同安咁好咯，贏馬次數唔算多，後來仲離開馬圈，羅國洲好紅之時，沈集成出咗一張《沈集成馬經》，好似出咗一季就冇咗影，相信捱得幾辛苦。但後來馬會畀機會佢，沈集成跟隨愛倫做事多年，卒成為練馬師，成績非常唔錯，有好多大馬主支持，此乃先苦後甜，與羅國洲之先甜後苦相反，今日有意投身馬圈嘅年青人，從低做起，可以沈羅為鑑！
當然，亦有人一帆風順，歷久不衰嘅，就係告東尼嘞，三十年來，佢由一位冠軍紅牌騎師，成為冠軍騎師，世界級騎師，到𠵱家係世界級練馬師，可講話從來不知愁滋味，事事順遂，同佢爭騎師冠軍嘅摩加利，現在喺澳門，聲勢遠遠不及告東尼。羅國洲係少年得志型，告東尼係勤力天才型，沈集成係艱苦奮鬥型。年青人應該學邊個，自問冇天才嘅，唔使學告東尼嘞，沈集成先至係好榜樣。