人物：錢小豪
時間：00年7月11日
地點：粉嶺名都花園百佳超級市場
經過：武打影星錢小豪，雖然於94年喺西貢寓所勇擒賊匪而獲頒好市民獎，但因為一宗偷拍裙底春光事件，搞到佢正氣形象蕩然無存。
00年7月11日，錢小豪涉嫌將一部開着咗嘅手提攝錄機藏喺旅行袋，喺粉嶺名都花園嘅百佳超級市場裏面偷拍女顧客嘅裙底春光，超市職員發現後報警求助，警方接報後將佢拘捕，以「遊蕩導致他人擔心」罪名起訴佢。事發第二日，小豪女友丘倩鳴力撐男友因為飲咗酒，先至惹起誤會，又話百分百信任男友。跟住喺13號當日，小豪帶埋女友喺尖沙嘴開記者會，聲稱自己因為醉酒惹事，又眼濕濕話對女友唔住，但就全程避談偷拍事件。結果同年10月，因為原告冇出庭關係，小豪無罪釋放，但法官喺庭上面直斥佢嘅行為可恥，要佢守行為24個月，如果再犯嘅話就要監禁。
呢次事件，令小豪健康形象盡毀，但好在佢仲有女友喺背後默默支持，佢哋兩個喺02年結婚，到同年9月，丘倩鳴仲為小豪生咗個仔，今時今日兩公婆都係咁恩愛。
本欄逢周一至周六刊出