食蟹當然是秋天最好，淡水的湖蟹河蟹統統肚滿膏肥，人人都高呼一句：「膽固醇萬歲，食咗先算！」當5月天黃油蟹又未到，大閘蟹又有排至會肥，加上要為健康着想，食海蟹會較適合，因為主要食肉。幸好本地有紅及青蟹當造，大大隻啖啖肉，不過師傅話：「我會食紅棄青！」
記者：梁學文
攝影：伍慶泉
Model：Gigi、Ben
蟹公肥大待交配
原來雌蟹每年春天產卵後，肚空又冇膏，只得一個空蟹殼。所以5月天最好吃蟹公，尤其是大紅蟹的蟹公，隻隻都大大隻，平均有斤幾兩斤重，蟹肉實實淨淨，入口啖啖肉。其實蟹公大隻啲，跟5月份是大紅蟹交配高峯期有關，曾超敬師傅話：「5月係大紅蟹準備交配嘅季節，尤其係5月尾，隻隻都會食到好肥大，特別係蟹公，隻隻都好肉地，無論係箝、身或爪都肥嘟嘟。」大紅蟹其實是屬於肉蟹類，所以蟹膏欠奉，但是蟹肉夠多，蟹殼夠薄，而且低脂肪及低膽固醇，唔似食膏蟹咁滯。
紅蟹肉多煮法多
1隻大紅蟹小則1斤重，大則重3斤，就算只用大紅蟹的蟹箝做菜，都一樣好多肉，曾師傅教路：「5月的大紅蟹斤幾重，正所謂不時不食，加上呢個時候貨源夠，價錢自然抵，無論係香港水域或菲律賓一帶嘅紅蟹，同樣貨多且靚。呢期嘅蟹夠大，淨係一對蟹箝都可以做到一味菜，一隻蟹可以煮出幾味餸。」平時食蟹好煩，尤其是出街食，要顧儀態又要顧清潔，最慘就是拆完蟹，結果得番幾両肉，費時失事，而大紅蟹夠斤両，就算拆開慢慢食，都唔會得個殼。
蟹腳唔透光係正貨
要知道隻蟹夠唔夠肉，曾師傅教落最緊要㩒吓隻蟹腳，如果一㩒猛標水，即代表唔夠肉得蟹水。另外，亦可以搵燈照照隻蟹腳，太過透明就代表水多肉少，千祈唔好揀。
大紅蟹小檔案
大紅蟹生長於鹹水，是肉蟹的一種。由於是海蟹的關係，特別有種海水的鮮味，肉質入口帶鹹，不過夠清爽。
三葱香辣爆大紅蟹
用京葱、洋葱、亁葱爆大紅蟹，未放入口就經已感覺到香辣的感覺。香，是來自3種葱；辣是來自指天椒同豆瓣醬。一上枱就好香，放入口未至於辣爆，不過就好惹味。
豉椒涼瓜蒸大紅蟹
不得不試的是涼瓜，大紅蟹反而變成配角。平時食涼瓜會有陣苦澀味，不過今次同大紅蟹一齊蒸之後，仲吸收了蟹的鮮味，令味道變得更特別。而蟹肉的味道則變得香濃，鮮甜之中又帶點甘味。
腐乳醬燒紅蟹
平時用薑葱煮蟹，食得多都會悶，所以師傅就加入腐乳醬去煮，令紅蟹有薑葱的清香之餘，亦多了一種鹹香味。蟹肉本身有些少鹹，腐乳又鹹味重，不過放入口又不是想像中的鹹鹹配搭，反而更有海鮮的味道。
金銀蒜糯米蒸大紅蟹
金銀蒜其實是生熟蒜，師傅將金銀蒜鋪底，加入糯米飯，最後將對蟹箝放面蒸，糯米飯吸收了蟹的鮮味，更加清甜可口。
明閣（35523300）
地址：旺角上海街555號朗豪酒店6樓
營業時間：11am-2:30pm、6pm-10:30pm
收費：因應所揀大紅蟹的重量而定，$28/両，煮法任揀。
