賓架Ｐ在結婚紀念日請食飯，到馬會打吡廳食西餐，人客講吓結婚時趣事。左丁山認叻，話與太太係大學同系同班同學，認識最耐。點知建築Ｆ喝住：「未輪到你，我與太太係小學同學，一齊參加教堂詩歌班，夠耐未？」於是人人賀佢青梅竹馬，白髮齊眉。
賓架Ｐ之千金，今年升大學，九月到LSE做大學生，左丁山儍儍地咁問：「點解唔去劍橋牛津呀？」賓架Ｐ嘆一聲天意如此，有一段故事。話說Ｐ千金在英國讀咗四年寄宿中學，一向成績優異，老師鼓勵佢申請劍橋牛津，點知高考成績公布，得二A一B一D，大失所望，喊咗一場。攞Ｄ嘅係經濟學，一向係Ｐ千金強項，學校老師大惑不解，代佢申請查卷，一查再查之下，考試當局致歉加分，原來Ｐ千金試卷內有一條問題答案得六十分，但計分時計漏咗，於是畀佢Ｄ，查找清楚後，重新計分，經濟科攞番Ａ。但查完之後，已經失咗報讀牛劍嘅時間，唯有揀倫敦經濟學院。好啫，呢間大學冇校園，位於倫敦中心區，大把錢，好多好多國際知名人士到倫敦公幹或開會之時，唔覺意就去咗LSE演講，演講會差唔多無日無之。肥仔Ｋ以前在倫敦之時，雖然唔係LSE學生，都周時去LSE聽演講，Ｐ千金以後三年，在此一定得益不少，希望佢忘記英國高考之烏龍評分事件啦。
LSE以前有位名教授，同時係芝加哥大學教授，就係HarryJohnson，乃教授Ｗ之老師。讀博士之時，教授Ｗ有一位日本同學取得博士學位，懇求HarryJohnson寫一封好好嘅推薦信，等佢返日本申請做大學教授。Johnson話：「你係一個好學生，但唔係最好嘅學生，所以我會寫一封好嘅推薦信，唔會寫好好（verygood）嘅推薦信。」日本博士怏怏不樂，無奈回國，因Johnson教授嘅推薦唔係verygood嗰種，結果搵唔到大學教職，逼住入咗股票經紀行做經濟師。故事結局如何呢？教授Ｗ話：「呢位同學成為公司總裁，名震日本。」